Kryeministri Edi Rama është pyetur nga gazetarët lidhur me shkarkimin e ish-ministri të Financave, Arben Malaj, si anëtar i bordit të Bankës së Shqipërisë.
Në një konferencë për mediat, pyetja që iu drejtua më konkretisht kryeministrit nga gazetarët ishte: “Pse grupi juaj parlamentar po e shkatërron një socialist të vjetër si Arben Malaj?”
Lidhur me këtë situatë, Rama u shpreh se largimi i Malajt u kërkua nga deputetët, ndërsa shtoi se nuk ka asgjë personale me të.
“Pyesni deputetët që kanë kërkuar largimin e zotit Malaj. Ju nuk e besoni. Unë nuk lexoj, përveçse në raste shumë të rralla që m’i rekomandon Fuga. Kritikat unë i mbaj shumë më tepër se sa dukem dhe jam shumë i vëmendshëm me kritikat në përgjithësi. Nuk kam asgjë personale me askënd. Doja të thoja nuk kam asgjë as me atë dhe as me Bashën, por me Bashën kam diçka personale. Nuk di si ta ndihmoj”, deklaroi Rama.
Kujtojmë se qëndrimet publike të Arben Malajt u konsideruan nga mazhoranca si shkelje të etikës të detyrës që mban.
