Nga Anxhela Ferra
Gjatë përfundimit të vitit 2019-të, kryeministri Edi Rama prezantoi paketën Anti-KÇK. Me këtë projektligj, të ashtuquajtur anti “Kap çfarë të Kapim”, qeveria paralajmëroi ndryshime thelbësore në luftën kundër krimit të organizuar.
Zbatimi i këtij akti normativ nisi në 3 Shkurt, me Operacioni Forca e Ligjit e cila doli në terren për të sekuestruar dhe hetuar pasurinë e atyre që nuk e kanë vërtetuar.
Ndërsa forcat politike janë duke e komentuar këtë nismë me tone të ndryshme. Ku Partia Demokratike ka akuzuar kryeministrin Rama se me këtë paketë kërkon të minojë Prokurorinë e Posaçme Anti korrupsion dhe sipas tyre ajo do të dështojë. Por, ndryshe është shprehur mazhoranca. Ku kryeministri Rama ka folur me tone të ashpra, duke thënë se ende nuk është parë gjë akoma.
Por, çfarë mendojnë qytetarët? Teksa disa as nuk e njohin se cili është thelbi i kësaj pakete, të tjerë shprehen se është diçka pozitive. Mirëpo, janë skeptikë sa i përket zbatimit të saj.
“E kemi dëgjuar si paketë, por se çfarë do të thotë nuk e dimë. Do të ishte një ëndërr shumë e bukur për tu bërë realitet, zbatimi i kësaj pakete. Por, jetojmë në Shqipëri.”
“Ça besimi, besimi ka vdekur. Kjo reformë duhet të kapej nga koka, kush ka qenë i madhi 30 vjet. Se këta të gjithë pak a shumë janë të kapur. Nuk kanë çfarë të kapin më. Tani i ka mbetur të kapin vetëm veten e vetë dhe të vënë një litar aty te pema e të varen.”
“Me këtë paketë do kapin ndonjë zog të vogël, harabel; skanë për të kapur gjë tjetër. Sa besim kam unë te kjo gjë, do ta shpreh me një vjershë që kam krijuar.
Ca çakej e ca hiena,
ca vampirë e kanibalë;
o këtë Shqipërinë na e shkatërruan fare,
na e bënë të na duket varr.”
“Si paketë më duket shumë mirë, nëse do të funksiononte. Pasi unë nuk besoj se do të zbatohet, sepse këta janë KÇK vetë.”
Sipas qytetarëve të pyetur nga Tirana Today, zbatimi i kësaj pakete duhet të nisë nga individë të politikës. Pasi sipas tyre ata janë më të rrezikshëm, madje më tepër se kriminelët.
“Zbatimi i saj duhet të niste nga lartë, te qeveria, politikanët dhe pastajë të zbresë poshtë. Politikanët janë më të rrezikshëm sesa kriminelët e organizuar. Për arsyen se politikanët janë mburojë e këtij grupimi.”
“Krimineli më i madh i Shqipërisë është ai që na drejton. Nuk kam asnjë besim se do të bëjnë diçka. Sepse të gjithë janë hajdutë.”
“KÇK-ja është muhabet kot. Anti KÇK-ën duhet ta bëjnë me veten, duke filluar nga kryeministri e dëri te Saliu. Politikanët janë më të rrezikshëm, sepse kriminelët e marrin mbështetjen nga ata.”
“Ne sot nuk kemi besim te asnjë, sepse nuk kemi parë asnjë gjë të hajrit. Politikanët janë më të rrezikshëm, sepse kriminelët nga politikanët përfitojnë.”
“Dhe kriminelët, por edhe politikanët janë të rrezikshëm po njësoj. Kriminelët pa politikanët a bëjnë dot?! Kurse këta të fundit as nuk kanë për të nxjerrë gjë në dritë, sa i takon kapjes së tyre.”/ TIRANA TODAY
