Me fillimin e seancën plenare ka nisur dhe protesta e gjashtë e opozitës. Prej orëve të para protestuesit kanë hedhur shashka dhe tymuese drejt policëve. Pas disa tentativave për të çarë kordonin e efektivëve, protestuesit shoqëruar nga ish-deputetët u ulën në shesh. Si një shenjë qëndrese për të treguar që do të qëndrojnë gjatë.
Ndërkohë sot në Parlament Ralf Gjoni, Nimet Musai dhe Enada Koçiraj bënë betimin si deputetët pasues që zënë karriget e LSI-së. Duke çuar kështu në 14 numrin e ligjvënësve të rinj, 11 prej të cilëve vijnë nga radhët e Lëvizjes Socialiste për Integrim. Ish-deputetja Klajda Gjosha thotë për Tirana Today se nuk e njeh opozitën e re të Parlamentit shqiptar.
“Nuk mund të ketë deputetë të rinj që zëvendësojnë mandatet e dorëzuara nga opozita zyrtare. Për arsyen e vetë sistemi proporcional të cilin ne kemi sot në vend. Unë mendoj që LSI-ja është e çliruar tashmë nga individë të cilët gjithmonë kanë dashur ta shfrytëzojnë atë për interesa personale. Opozita e vërtetë është këtu bashkë me gjithë shqiptarët. Kurse ata që do të bëjnë opozitën tani në Parlament nuk i njeh ligji.”
Teksa opozita akuzon kryeministrin Rama se i ka fituar zgjedhjet e Qershorit duke blerë vota, Rudina Hajdari në një intervistë ku shpejgonte arsyet e mos dorëzimit të mandateve, u shpreh se nuk do të luftojë në krahë me LSI-në sepse ka pasur probleme me shit-blerjen e votave. Kësaj deklarate te deputetes, Gjosha i përgjigjet duke thënë se as nuk e njeh apo të ketë qenë mjaftueshëm prezent Hajdari në Parlament.
“Kush është zonjusha Hajdari, se unë nuk e njoh. Nuk besoj të ketë luftuar aq shumë në Parlament për zërin opozitar.”/ Tirana Today
