Para se të niste seanca e sotme plenare pranë Parlamentit u mblodhën me dhjetëra protestues së bashku me ish-deputetët e opozitës. Ishin banorët e Astirit ata të cilët shkaktuan edhe përplasjet e para me policinë. Ato tentuan të futen drejtë Pedonales, zonë e cila ishte e rrethuar nga forcat e rendit, duke shërbyer edhe si vendkalim për deputetët e mazhorancës për të hyrë në Kuvend. Si pasojë pati edhe disa të shoqëruar nga forcat e rendit, mes tyre edhe femra.
Më pas situata ka vijuar e tensionuar, ku nuk kanë munguar tentativat e shumta të protestuesve për të çarë kordonin e policisë. Protesta e cila nisi që prej orës 9:30 para ambienteve të Kuvendit është protesta e shtatë që opozita ndërmerr.
Sikundër në protestat e shkuara, protestuesit kanë hedhur mjete piroteknike dhe tymuese drejt kordonit të policisë. Për më shumë se dy orë, ish-deputetët u ngjitën në podiumin e improvizuar, duke bërë thirrje dhe akuza drejt kryeministrit Rama.
Gjatë kësaj kohe nuk munguan as incidentet, pas përleshjeve të vazhdueshme mes protestuesve dhe efektivëve. Përplasjet u nxitën edhe nga ish-deputetët si Flamur Noka dhe Edi Paloka, të cilët i bënin thirrje qytetarëve për tu bashkuar në çarjen e kordonit. Edhe pse forcat e rendit ishin përgatitur edhe me auto bote me ujë, ato po ashtu as gazi-lotsjellës nuk u përdor prej tyre. Gjatë konfrontimeve me forcat e rendit, edhe pse nuk pati të lënduar, disa prej protestuesve janë ndjerë keq.
Pas thirrjes nga Noka, protestuesit së bashku me ish-deputetët marshuan drejt Ministrisë së Brendshme, ku kërkuan “lirimin e të arrestuarve”. Sërish nuk munguan tensionet, ku veç hedhjes së shashkave drejt efektive, protestuesit lyen me bojë të zezë godinën. Gjatë kësaj kohe protestuesit thirrjen “Rama ik”, e zëvendësuan me “Rama i zi”.
Me ne krye kreun e PD-së, Basha dhe kryetaren e LSI-së, Kryemadhi; protestuesit u drejtuan drejt Bulevardit, për të mbyllur protestën në selinë e Partisë Demokratike. Në fjalën përmbyllëse Basha deklaroi se nuk do të ketë zgjedhje me Ramën, duke i bërë edhe një thirrje socialistëve.
“Orët e bandës po numërohen mbrapsht. Kush nuk e ka kuptuar le ta kuptojë mirë e qartë zgjedhje me Ramën nuk do të ketë, pakt me Moduron e Ballkanit nuk do të ketë. Kjo qëndrese ka nisur për t’i kthyer qeverisjen çdo shqiptari e nuk do ndalet derisa ta bëjë realitet. Socialistë të tradhtuar, ngrijeni kokën bashkohuni me lëvizjen e shpresës.”
Më herët Basha ka deklaruar se protesta e radhës e madhe do të jetë në 13 prill, por ndërkohë nuk do të mungojnë protesta të ngjashme si sot sa herë që të ketë seancë parlamentare./ TIRANA TODAY
