Grida Duma duke folur për përjashtimin e Rudina Hajdarit nga strukturat e Partisë Demokratike, tha se politika ka uljet dhe ngritjet e veta dhe se historia njeh rikthimet. Në këtë mënyrë, edhe pse theksoi se vendimi i takon forumeve, Duma ka lënë të hapur një shteg për rikthimin e Hajdarit në PD.
Për Dumën vendimet si ai i djegies së mandateve apo aksionet politike i vendosin forumet politike dhe ky vendim duhet të zbatohet nga të gjithë anëtarët e saj.
“Vendimi i takon forumeve dhe kur forumet vendosin një gjë për njërin, ajo duhet të zbatohet për të tjerët, kështu funksionon në një organizatë. Kush është figurë politike me trashëgimi politike, di të tregojë veten. Politika ka uljet dhe ngritjet e veta dhe historia i njeh rikthimet”, ka thënë Grida Duma në një intervistë për A2 CNN.
Rudina Hajdari deklaroi në një intervistë për Zërin e Amerikës se nuk do ta dorëzonte mandatin, edhe pse mund të përjashtohej. Ajo risolli në kujtesë edhe dy rastet ku babai i saj Azem Hajdari u përjashtua nga Partia Demokratike, por sërish u rikthye aty.
Demokratja ka komentuar me një batutë edhe kritikën e aleatit Dashamir Shehi, që e cilësoi si “stalinizëm” përjashtimin e “rebelëve” të opozitës në Parlament. “Dashi mund ta aplikojë këtë në partinë e tij…”, thotë Grida, duke buzëqeshur.
