Në pamje të parë, u duk sikur sot u arrit një sukses për PD dhe aleatët e saj. Në atë tryezë të papritur, ku edhe Taulant Balla vë dorën në ‘zjarr’ se nuk ka patur një marrëveshje të fshehtë, PD dhe LSI fituan me shumë mund atë që e dorëzuan një vit më parë. Ata ikën nga Kuvendi me krenari, protestuan vazhdimisht duke dhënë provat se do të luftonin deri në triumf. Dhe në fund u kthyen në pikën që ishin.
Në takimin që zgjati 60 minuta mes Damian Gjiknurit, Rudina Hajdarit, Oerd Bylykbashit dhe Petrit Vasilit, u dakordësua që afati përfundimtar për miratimin e Reformës Zgjedhore të jetë 15 marsi. Gjatë takimit u vu re një frymë paqtimi, ndryshe nga tonet e larta dhe zëri agresiv që ka pllakosur përgjatë një viti televizionet shqiptare.
Sot u ofrua një tablo tjetër, plot ngjyra. U dhanë provat se PD-ja ‘është zbutur’ ndaj Gjiknurit, ndonëse për muaj me radhë e kishte kthyer në kryefjalën e ditës. Në përfundim të takimit, u tha se dokumenti i publikuar sot, është garancia se procesi po bëhet me konsensus të palëve politike. Por ndryshe nga kjo ‘shfaqje’ e cila iu ofrua publikut, PD mendonte ndryshe më parë. Sot faktoi se Gjiknuri nuk përbënte më problem për këtë forcë politike.
Pak muaj më parë, PD-ja kërkoi largimin e Gjiknurit si kryetar i Komisionit të Reformës Zgjedhore. PD deklaroi në muajin shtator se nuk do ta njohë këtë komision nëse Gjiknuri nuk jep dorëheqjen nga Reforma Zgjedhore. Kjo pasi emri i tij u përmend në përgjimet e publikuara nga gazeta gjermane ‘Bild’.
Gjiknuri u akuzua si organizator i vjedhjes së votave në zgjedhjet lokale të vitit 2017 në Dibër, ku zëri i tij doli në përgjime. Ai cilësohej nga PD si arkitekti i blerjes së votave.
Asokohe, sekretari i Përgjithshëm i PD-së, Gazment Bardhi deklaronte: “Propaganda është më e ethshme se asnjëherë për të mbuluar thelbin e asaj që u arrit me ndërmjetësimin e partnerëve ndërkombëtarë: 1. Reforma zgjedhore nuk do të diktohet nga qeveria e votave të blera. 2. Vendimet për reformën zgjedhore do të merren me konsensus jashtë Parlamentit ilegjitim. 3. Parlamenti është vetëm noter formal i vendimeve të tryezës politike. Përfaqësimi në tryezën e reformës zgjedhore me një nga arkitektët e blerjes së votës është në turpin e PS. Në dorën tonë nuk është të zgjedhim kundërshtarin, por të bëjmë çdo gjë për zbatimin e reformës zgjedhore, që çon vendin drejt zgjedhjeve. Në dorën e qeverisë është të heqë gjendjen e jashtëzakonshme dhe t’u hapë rrugë zgjedhjeve të lira e të ndershme. Në dorën e qeverisë është të heqë gjendjen e jashtëzakonshme dhe t’u hapë rrugë zgjedhjeve të lira e të ndershme”.
Që mazhoranca dhe opozita të arrinin të uleshin përballë njëra-tjetrës, është dashur një përpjekje e vazhdueshme nga ndërkombëtarët. Duket se përpjekja e trupit diplomatik në Shqipëri, për të ulur palët në dialog, ia doli mbanë. Po kështu, shtrëngimi i duarve ishte mjaft domethënës, duke treguar se jeta vazhdon…
