Zëdhënësi i BE-së, Peter Stano, njofton se dialogu mes Kosovës dhe Serbisë, me ndërmjetësimin e Bashkimit Evropian, do të rinisë më 12 korrik.
Sipas tij, kryeministri i Kosovës, Avdullah Hoti dhe presidenti i Serbisë, Aleksandar Vuçiç do të takohen në raundin e ri të bisedimeve.
Nga ana tjetër, AFP raporton se presidenti Macron dhe kancelarja Merkel do të mbajnë një samit të premten, më 10 korrik, me përfaqësuesit e Kosovës dhe Serbisë.
Sipas zyrës së presidentit francez, samiti ka për qëllim uljen e tensioneve ndërmjet Kosovës dhe Serbisë. Ndërkohë, nuk është ende e qartë nëse do jetë Hoti ai që do ta përfaqësojë Kosovën në këtë samit, apo presidenti Thaçi.
Mbajtja e samitit në Paris dhe dialogut në Bruksel vijnë pas shtyrjes së takimit të 27 qershorit në Shtëpinë e Bardhë.
