Opozita ka zhvilluar ditën e sotme protestën e radhës para Parlamentit. Ndërkohë që brenda zhvillohej seanca plenare, ku u betuan edhe tre deputetët e rinj nga radhët e LSI-së, protestuesit tentuan disa herë të çanin kordonin e policisë. Ashtu si ish-deputetja e LSI-së Gjosha, edhe Kryetari i Lëvizjes për Zhvillim Kombëtar, Dashamir Shehi në një prononcim për Tirana Today shprehet se nuk i konsideron si opozitë deputetët e listave pasuese që pranuan mandatet.
“Ata që kanë hyrë tani në Parlament nuk janë opozitë, janë thjesht qytetarë që i pëlqen mandati.”
Shehi foli edhe për akuzat e bëra nga deputetja Rudina Hajdari mbi Lëvizjen Socialiste për Integrim për problemet që ka apsur me shit-blerjen e votave. Sipas tij në to ka të vërteta, por nevoja për të larguar kryeministrin Rama është më e madhe. Saqë ka bërë që për disa gjëra të aleatëve të mbyllen edhe sytë.
“Në akuzat për LSI-në dhe shit-blerjen e votave ka të vërteta në këtë mes, por ne kemi një rrezik më të madh përpara dhe ai është Edi Rama. Prandaj për hir të kësaj pune, për disa gjëra e kemi mbyllur nga një sy.”
Edhe pse gjatë qëndrimit para Parlamentit u hodhën edhe shashka apo tymuese drejt policisë, protesta ishte e qetë. Dhe nuk pati incidente të rënda, ndaj edhe pse policia kishte përgatitur dhe autobotet me ujë, ato apo gazi lotsjellës nuk u përdorën nga efektivët.
“Protestat kanë qenë paqësore, ky është realiteti. Nuk ka ndodhur asgjë, ja ku është Tirana, dyqanet, nuk është thyer asnjë xham apo të jetë plagosur ndonjë njeri. Kush e ekzagjeron për këto çështjet e dhunës është duke thënë një gënjeshtër të madhe. Opozita ka qenë shumë paqësore dhe kështu do të vazhdojë. Normale që dhe policia do të bëjë punën e vetë. Por, kush shkon të demonstrojë dihet që kjo është. Nuk po ndodh ndonjë gjë e veçantë në Shqipëri,”-përfundon Shehi për Tirana Today.
Pas më shumë se 3 orësh para Kuvendit, ish-deputetët dhe protestuesit u nisën drejt Drejtorisë së Policisë. Teksa kërkonin lirimin e protestuesve të tjerë, situata ka agravuar duke u qëlluar me shishe në xhamat e godinës. Pasi qëndruan afro 30 minuta brenda ambienteve të Drejtorisë së Policisë, përfaqësuesit e PD-së dhe LSI-së i vendosën ultimatum policisë, duke kërkuar që 14 të shoqëruarit të lirohen menjëherë dhe prokuroria të mos merret me fëmijët e shqiptarëve, por me të korruptuarit./ TIRANA TODAY
