Ministria e Brendshme dhe Ministria e Infrastrukturës dhe Energjisë e konsideron “akt terrorist” sulmin me tritol ndaj një shtylle të tensionit të lartë në Fushë Krujë.
Ministria thekson se po zhvillohen hetime për të zbardhur rastin.
Sipas Ministrisë së Brendshme, lënda shpërthyese ishte vendosur 5-6 metra mbi nivelin e tokës, ndërsa dyshohet se ka qenë shpërthim me fitil-përcjellës.
Në deklaratë, të dyja ministritë e cilësojnë dëmtimin e shtyllës si një akt terrorist që rrezikon lënien e vendit pa energji elektrike.
“Akt terrorist. Po punohet për zbardhjen e ngjarjes. Shpërthimi rrezikoi shembjen e shtyllës. Shembja rrezikonte të linte gjithë vendin pa energji. OST po merr masat e nevojshme. Dënojmë këtë akt dhune, synon të krijojnë pasiguri”, shprehen në deklaratë.
Shtyllës së tensionit të lartë të linjës Tiranë–Podgoricë dhe Tiranë-Prizren, iu vendos tritol mesditën e sotme në fshatin Krastë të Thumanës në zonën e Fushë Krujës.
“Sot në mesditë, punonjësit e OST, pranë fshatit Krastë, Thumanë, konstatuan se njëra këmbë e shtyllës dyfishe të tensionit të lartë (400 KW), Nr. 65, e linjave Tiranë–Podgoricë dhe Tiranë-Prizren ishte dëmtuar me lëndë, të dyshuar eksplozive”, sqaronte policia.
