Ish-deputeti i Partisë Demokratike, Flamur Noka i ftuar në studion e “Fax News” ka komentuar protestën e ditës së shtunë dhe vazhdimësinë e saj.
Sipas tij, Shqipëria është zhytur më thellë në krizë, kështu që kryeministri Rama dhe qeveria e tij nuk mund të fshihen “pas gishtit dhe të bëjnë rolin e strucit”.
“Ajo që është thelbësore në këtë çështje është që Shqipëria është zhytur më thellë në krizë, në një krizë politike dhe institucionale. Nuk mund të fshihesh pas gishtit. Edi Rama dhe “Rilindja” nuk mund të fshihen pas gishtit dhe të bëjë rolin e strucit.
Të gjithë e pamë që shqiptarët në 16 mars folën njëzëri dhe oshtinë shumë herë më tepër se në 16 shkurt. Kjo tregon që Shqipëria është në një rrugë pa kthim për shporrjen e narko-shtetit, që Shqipëria t’i hyjë normalitetit politik, ekonomik, social”.
Gjithashtu, ish-deputeti theksoi se qeveria dhe bandat e saj janë në minorancë, ndërsa opozita në koalicion me LSI dhe me mbështetjen e partive të tjera, është në mazhorancë.
Sa i përket djegies së mandateve, Noka thekson se ndihet shumë mirë për vendimin që mori, dhe nuk mund të pranojë mandat tjetër veç mandatit që i japin qytetarët.
“Një gjë është e qartë si drita e diellit, ne blloku opozitar jemi maxhoranca në këtë vend.
Edi Rama mund ta fsheh kokën në ndonjë ambasadë por kjo nuk do shpëtoj gjithmonë. Të gjithë e dimë se OSBE është paradhomë e Edi Ramës, zyrë shtypi e “Rilindjes”.
Qeveria me gjithë paratë e drogës dhe bandat prapë janë minorancë , opozita është maxhorancë në koalicion me LSI dhe mbështetjen e partive të tjera.
Sot shohim një parlament monist me arnime, sot vendi është në diktaturë të krimit dhe korrupsionit. Sot në Shqipëri vullneti politik i shqiptarëve është inekzistent. Le të deklarojë kush të dojë, qeveria është ilegjitime. Dhe nisur nga kjo protesta e radhës do të jetë më e fuqishme se ajo e 16 marsit. Protestë që shumë shpejt do të përshkallëzohet”, deklaroi Noka.