Opinioni publik është ndarë në dy kahe, sa i takon vendimit të presidentit Meta për të anuluar zgjedhjet vendore, të cilat ishin vendosur të mbaheshin më 30 qershor.
Disa i qëndrojnë argumentit të Metës, se me këtë vendim ka shmangur një përplasje civile, e disa të tjerë mendojnë se ky akt favorizon opozitën jo parlamentare. Aludimet shkojnë deri aty sa mendojnë se personi që mund të ketë ndikuar në marrjen e këtij vendim mund të ketë qenë dhe kryetarja e LSI-së, Monika Kryemadhi.
Për Metën kjo lëvizje ishte e domosdoshme, pasi sipas tij pjesëmarrja në zgjedhje vetëm e mazhorancës cenon parimin kushtetues të pluralizmit. Ndër të tjera, argumentoi se zhvillimi i zgjedhjeve në kushtet e një situate të tensionuar politike, mund të sjellë si pasojë jo vetëm mospjesëmarrjen në zgjedhje të rreth gjysmës së votuesve, por krijon edhe rrezikun e një konflikti civil.
Ndërkohë, kryeministri Rama i mëshon faktit se vendimi i tij është politik dhe aspak kushtetues, pasi sipas tij nëse presidenti interesohet që vendi të shpëtojë nga një përplasje civile, duhet të nisë pastrimin e politikës, duke ‘këshilluar’ fillimisht krerët e opozitës që mos të ushtrojnë dhunë dhe të përhapin urrejtje mes shqiptarëve, por të marrin pjesë në zgjedhje.
Kujtojmë se presidenti Meta firmosi ditën e djeshme dekretin për të shfuqizuar datën e zgjedhjeve vendore, e nga ana tjetër, Partia Socialiste ka nisur procedurat për shkarkimin e Ilir Metës nga posti i presidentit.
Në këto kohë trazirash, është e rëndësishme që vendi të shpëtojë nga kaosi që ka injektuar politika. Por, mos ndoshta kjo lëvizje e presidentit ia shton “hallet” Shqipërisë?!
Tirana Today pyet qytetarët përmes një sondazhi se çfarë ata mendojnë lidhur me vendimin e Metës, a është ky vendim i drejtë me arsyetimin se shmang përplasjen civile në vend, apo është një vendim i gabuar dhe partiak me të cilin Meta po favorizon opozitën?
Klikoni linkun e mëposhtëm për të marrë pjesë në sondazh:
*Si ju duket vendimi i Metës për anulimin e zgjedhjeve vendore?
