Pas disfatës në zgjedhjet europiane kryeministri grek Alexis Tsipras dha dorëheqjen nga detyra. Njëkohësisht kreu i qeverisë bëri thirrje për zgjedhje të parakohshme. Pak ditë më parë edhe kryeministrja e Britanisë Theresa May lajmëroi largimin nga drejtimi i vendit si edhe si drejtuese e Partisë Konservatore në pushtet. Kjo pas ngecjes dhe dështimit të procesit Brexit.
Ndërkohë në Shqipëri prej muajsh zhvillohen protesta nga opozita dhe mijëra mbështetës të cilët kërkojnë largimin e Kryeministrit Rama dhe zhvillimin e zgjedhjeve të parakohshme. Tirana Today pyeti qytetarët nëse kryeministri duhet të marr shembullin e homologëve të vetë apo jo. Disa prej tyre janë të mendimit se duhet të përfundohet mandati dhe zgjedhjet e përgjithshme të kryhen në 2021.
“Kryeministri ynë është i zgjedhur nga populli, ata që dalin dhe protestojnë kundër tij nuk janë popull. Ata protestojnë për veten e tyre dhe jo rrëzimin e Kryeministrit, janë politikanë.”
“Ne nuk jemi Greqia apo Britania që të japë edhe ky patjetër dorëheqjen. Ai është më i mirë se këto plehrat që çohen e protestojnë. Unë mendoj që duhet të merren vesh njëri me tjetrin, ose t’ia japin një partie tjetër. Është Partia Balli Kombëtar, asaj duhet t’ia japim.”
“Rama nuk ka pse e jep dorëheqjen, sepse nuk ka kush e merr pushtetin. Basha në 21 Janar vrau katër veta, Monika burrin e ka President e nuk shkon të bëhet ajo Kryeministre. Dhe zgjedhje të parakohshme nuk ka pse bën, ai populli të presë datën 30 qershor, se atëherë janë zgjedhjet. Këta kanë bërë krime, por Rama nuk ka bërë asnjë. Unë vë dorën në zjarr për të, nuk bën vaki ajo punë.”
Ndërkohë të tjerë janë të mendimit se kryeministri Rama duhet të bëjë njëjtë si kryeministrat e Greqisë dhe Britanisë. Ata thonë për Tirana Today se është vonuar shumë largimi i tij dhe se në pushtet duhet të vijnë njerëz të tjerë. Pasi ka ardhur koha që në vend të ndodhin ndryshime.
“Kryeministri ynë duhet ta kishte dhënë dorëheqjen me kohë, se kur ngrihet një popull duhet diskutuar diçka. Vërtetë kryeministri mund të ketë planet e veta, por prit ngadalë njëherë. Ne po ngelemi pa bukë, unë jam gjyshi yt dhe dal e mbledh kanaçe. Dhe ai nuk bën asnjë lloj llogarie. Jo se do më bëjë Lulzim Basha derman mua, por ama diçka duhet ndryshuar.”
“Rama duhej të ikte që 10 vite më parë, ky është më keq se Sllobodan Millosheviç. Rama i ka lënë gjithë shqiptarët në rrugë. Në vend të tij duhet të vëmë Lul Bashën, ai duhet se është bilbil mali. Kur të vihet Luli në pushtet të gjithë do të jenë në punë.”
“Po pse Greqia jemi ne?! Politikanët shqiptarët nuk e njohin atë kulturën, mendojnë vetëm për karrigen e vetë. Për pasurinë e tyre, nuk mendon kush për popullin. Prandaj asnjëherë nuk e japin dorëheqjen.”/ TIRANA TODAY
