Nga Anxhela Ferra
Teksa numri i të prekurve nga koronavirusi në Itali sa vjen edhe rritet, pjesa më e madhe e qytetarëve shqiptarë janë në ankth. Pavarësisht se Ministria e Shëndetësisë e ka bërë të qartë se në vend deri në këto momente nuk ka të prekur me virusin e rrezikshëm. Ndërsa Drejtoresha e Institutit të Shëndetit Publik, Albana Fico tha se nëse niveli i rrezikshmërisë do të ndryshojë për pesë minuta, Shqipëria i ka marrë masat për të përballuar situatën.
Por, ish-ministri i Shëndetësisë, Tritan Shehu në një intervistë për Tirana Today thekson se qeveria është shumë mbrapa me marrjen e masave.
“Nëse ndodhemi para një situate të tillë, që lutemi të gjithë të mos ndodhemi. Sepse Zoti të na mbrojë, pasi tjetërkush nuk na mbron dot. Ne duhet të mobilizohemi, nuk mjafton vetëm propaganda dhe fjalët. Detyra e parë e Ministrisë së Shëndetësisë ka qenë që prej një muaj më parë, paraqitja e një strategjie të qartë organizative. E cila do të jetë e implementueshme në Shqipëri, shumë transparente me të gjithë aktorët dhe me opinionin publik në vend. Sepse Shqipëria pa dyshim është një vend i rrezikuar, siç janë shumë vende të tjera.”
Sipas Shehut mos bërja transparente e informacioneve nga qeveria është një papërgjegjshmëri. Ai shton se qeveria është duke gënjyer sa i takon ekzistencës së karantinës.
“Fatkeqësisht sistemi ynë shëndetësor është më i nënfinancuari në Europë, është më pak se Maqedonia e Veriut dhe Kosova. Ka një numër mjekësh 1 për 1 mijë banorë, që është numri më i ulët i mjekëve që ekziston. Ka një numër shtretërish 2.2 për 1 mijë banorë, i cili po ashtu është numri më i ulët në kontinentin europian.
Dhe si i tillë, sipas statistikave dhe indikacioneve të organizmave ndërkombëtare; ofron shërbimin më të dobët ndaj pacientit. Ne kemi një kujdes parësor jo të përhapur në mënyrë kapilare. Me hapësira të mëdha boshe në terren. Një kujdes parësor të papajisur dhe të pafinancuar si duhet. Unë mendoj përgatitja e tij duhet të fillohej që një muaj e gjysmë më parë. Kemi humbur shumë kohë.
Së pari duhet transparencë. Nuk është sekret shtetëror vendndodhja e karantinës. Duhet të sqarohet mirë publiku. Duhet të thirren specialistë të huaj për të punuar me ta këtu në terren. Në mënyrë që të vendosen ato standarte të domosdoshme për këtë epidemi. Ku duhet theksuar që natyra e këtij virusi nuk është e qartë.
Të dalë Task-Forca e të thotë që nuk e deklarojmë se ku është karantina sepse shqetësohen njerëzit, për mua është një papërgjegjshmëri e plotë. Dhe kjo tregon që nuk ka karantinë, si edhe ata nuk janë duke thënë të vërtetën. Dhe këto janë të dy elementë të dënueshëm ligjërisht. As në 3D nuk është duke u dhënë karantina, ky është problemi.”
Edhe pse në Shqipëri fatmirësisht nuk janë diagnostikuar raste të prekura nga koronavirusi, rreziku është mjaft i lartë. Për këtë çështje është pyetur edhe presidenti Ilir Meta, nëse do e zhvillojë tubimin e 2 marsit në rast se në vendin tonë do konfirmohet ndonjë rast koronavirusi. Ku përgjigja e tij ka qenë ndër të tjera se ‘rreziku më i madh është murtaja që quhet rilindje’. Por, teksa një nga këshillat e OBSH është shmangia e ambienteve të populluara, sa të sigurt do të ishin qytetarët?
“Unë nuk hyj në këto diskutime. Deri tani nuk ka ndonjë të dhënë që në Shqipëri ka hyrë virusi. Masat që unë fola, janë masat afatgjatë. Pra, i takon të tjerëve të japin alarmet epidemiologjike në lidhje me këtë çështje. Unë do të protestoj kundër kapjes së Kushtetutës. Kam qenë dhe do të jem gjithmonë, sepse Shqipëria është nën një grusht shteti.”/ TIRANA TODAY
