Zëdhënësi i presidentit, Tedi Blushi ka bërë me dije se Meta do të kallëzojë në SPAK ministren e Drejtësisë, Etilda Gjonaj.
Përmes një postimi në Facebook, Blushi zbulon se padia është për ministren Gjonaj dhe për funksionarë të tjerë të lartë. Kjo pasi sipas tij, ata janë përfshirë në veprimtari të rëndë kriminale, në funksion të grushtit të shtetit.
Kjo është padia e dytë që presidenti dorëzon në SPAK, pas asaj për kreun e KED-së, Ardian Dvoranin.
“Presidenti i Republikës Sh.T.Z Ilir Meta do të depozitojë sot personalisht në ora 13:00, në Prokurorinë e Posaçme SPAK, kallëzimin penal për Ministren në detyrë të Drejtësisë, Etilda Gjonaj dhe funksionarë të tjerë të lartë të përfshirë në veprimtari të rëndë kriminale, në funksion të grushtit të shtetit”, shkruan Blushi.
