Politikanë të shumtë dhe figura të tjera të njohura të njohura kanë bërë sot homazhet në nderim të ish-deputetit, intelektualit të shquar poliedrik, Moikom Zeqo.
Teksa shoqërohej nga zv/kryetarja, Vasilika Hysi dhe deputetë të Kuvendit të Shqipërisë, Gramoz Ruçi pasi takoi familjarët e Zeqos, la një kujtim të fundit në bllokun e vendosur në homazhe para Muzeut Historik Kombëtar.
Në ceremoni mori pjesë edhe ish-deputetja e PS-së, Arta Dade, e cila pohoi se ka qenë nder për të gjithë atë që e kanë njohur dhe e kanë pasur mik Moikom Zeqon.
“Ka qenë ndër për ne që e kemi pasur Moikomin mik. Ikja e një miku është e dhimbshme. Lë pa një zbrazëti që nuk do të mbushet për shumë kohë. Do na mungojnë bisedat që bënte, bisedat e ngrohta. Do ta mungojë Moikomi si njeri. Aq i ndjeshëm. Ai është një erudit, dhe nuk ka lëndë të veprimtarisë njerëzore që nuk ka një kontribut. Pasi do të na lërë një zbrazëtirë, si njeri i madh dhe si një shqiptar i madh. Ndaj ai do të kujtohet me respekt dhe dashuri, ashtu siç e meritonte. Kjo ceremoni, e rrallë për kohën që mbahet, tregon se Moikomin e donin”, tha ajo.
Pasi shkroi disa përjetime në librin e vendosur për të pranishmit, ministri i Diasporës, Pandeli Majko tha se Zeqo për të do të mbetet gjithmonë një mik.
“Ishte jo vetëm një politikan i mirë, por një njeri i mirë. Për mua ai mbetet shok, mik. Është pjesë e asaj kur flasim për grupin parlamentar të PS, kam në mendje grupin më të mirë që kemi pasur grupin 91-96. Ai ishte ndër më të veçantit e atij grupi. Se them se është rasti, por ai i tillë ishte. Jo vetëm ishte një politikan i mirë, por një njeri i mirë”, tha ai.
