Ish-ministri i Drejtësisë, Ylli Manjani duke pasur parasysh situatën e tensionuar politike në vend, i bën thirrje politikës për tolerancë.
Në postimin e tij në Facebook, Manjani shprehet se kryeministri Rama dhe opozita e kanë për detyrë të dëshmojnë tolerancë, që të mos ketë përplasje mes popullit.
“Lutem e njëkohësisht kërkoj nga politika tolerancë! Le të mos e respektojnë njëri-tjetrin, por duke lëshuar nga pak kontribuojnë për paqe...”, thekson ish-ministri.
Duke folur për 30 qershorin, Manjani e mbyll postimin e tij me pyetjen “Pse të mos e zhvendosim këtë datë, një ditë tjetër ku të gjithë të shkojmë e të votojmë paqësisht?”, duke përsëritur thirrjet për tolerancë.
Postimi i Manjanit:
Këto ditë janë mundësia më e madhe që kanë në dorë udhëheqësit e këtij vendi të tregojnë TOLERANCË.
Në fakt kjo situatë tejkalohet më së pari me TOLERANCË.
Qeveria, më konkretisht Edi Rama, e ka për detyrë të tregojë tolerancë. Është Kryeministër dhe si i tillë ka detyrë të mos përplasë popullin e tij, pavarësisht bindjeve politike.
Opozita ka detyrë të dëshmojë tolerancë, pa qenë e nevojshme të heqë dorë nga beteja politike. Por më së pari paqja sociale është detyrë numër 1 e politikës.
Lutem e njëkohësisht kërkoj nga politika TOLERANCË! Le të mos e respektojnë njëri-tjetrin, por duke lëshuar nga pak kontribuojnë për paqe…
Zgjidhje ka plot, por si fillim duhet tërheqje nga llogoret absurde të datës 30.
Pse do mos e zhvendosim këtët datë një ditë tjetër ku të gjithë të shkojmë e të votojmë paqsisht?!
Toleroni o njerëz, se nuk jemi në luftë me njëri-tjetrin!
