Vrasja e ish-gjeneralit Qasem Soleimanit thelloi tensionet mes Iranit dhe Amerikës. Ai u vra në datën 3 janar, nga një sulm ajror i SHBA-së, ndërsa po linte Aeroportin Ndërkombëtar të Bagdadit. Një zyrtar i lartë i Departamentit Amerikan të Shtetit tha se Soleimani kishte qenë, për 20 vjet, “arkitekti kryesor” i sulmeve terroriste të Iranit. Si edhe kishte “vrarë 608 amerikanë vetëm në Irak.”
Por, ish-gjenerali edhe pse nga Amerika quhej armik, nga vetë Irani ishte një hero. Për pjesën më të madhe të popullsisë, po ashtu edhe për Udhëheqësin Suprem të Iranit, Ayatollah Ali Khamenei. Pas ngjarjes, ky i fundit u shpreh se “hakmarrje e rëndë i pret kriminelët” që qëndrojnë pas sulmit.
Madje ai mendohet të ketë folur edhe për Shqipërinë, duke e quajtur një vend të keq europian. Që po strehon armiqtë e vendit të tij, ku i referohej muxhahedinëve iranianë të pranuar nga Shqipëria. Si pasojë e një marrëveshje të bërë me SHBA-në.
“Është një vend shumë i vogël por shumë djallëzor europian, ku elementë amerikanë bashkëpunojnë me tradhtarë iranianë dhe planifikojnë kundër Republikës Islamike.”
Menjëherë pas ngjarjes, nëpër rrjete sociale nisi të flitej për mundësinë e një ‘Lufte të Tretë Botërore’. Por, edhe pse kjo gjë ka pak ose aspak gjasa të ndodhë, sërish njerëzit janë në tension. Dhe duket se kjo gjendje ka prekur edhe shqiptarët. Të cilët thonë për Tirana Today, se i tremb mundësia e një konflikti të gjerë. Madje, përdorimi i shpeshtë edhe nga mediat i retorikës për një ‘luftë të mundshme’ ka trembur edhe fëmijët e vegjël.
“Sigurisht të gjithë i tremb lufta dhe frika është. Gjithë bota është në një gjëndje shumë problematike. Ishalla nuk ndodh, por shumë afër është.”
“Jemi në jo pak tension, por përkundrazi shumë. Kjo frikë kalon edhe te fëmijët. Unë kam gocën e vogël 8 vjeçe dhe ajo trembet kur dëgjon gjithandej ‘luftë’.”
“Lufta ka filluar dhe kush është ai që nuk ka frikë nga lufta. Por, unë mendoj se të dyja shtetet do frenohen. Këtu në Shqipëri nuk ka për të ndodhur gjë.”
Për qytetarët ajo që është më shqetësuese lidhet me sigurinë e munguar që jep shteti shqiptar. Sipas tyre, në rast se do të ndodhte ndonjë sulm, Shqipëria është shumë vulnerabël për nga ana e mbrojtjes.
“Nga ato që po shohim në lidhje me konfliktin mes Iranit dhe Amerikës, duket se është gjë e rëndë. E rrezikshme është se nëse thellohet konflikti, hapet gjithandej pastaj. Ndaj, na tremb. Për më tepër që Shqipëria nuk ofron asnjë lloj sigurie, që të ndjehemi të qetë nëse ndodh diçka.”
“Frika ekziston, ndaj edhe ne trembemi. E vetmja gjë që na siguron është që jemi në Aleancën e NATO-s. Pasi çdo vënd ka ushtrinë e vetë, ne akoma nuk jemi fuqizuar. Nuk kemi ushtri, mall që mbrohemi nga NATO.”
Disa prej tyre janë të mendimit se derisa vendi ynë ka mbrojtjen e Amerikës, atëherë është shumë i sigurt. Dhe se interesi i Amerikës është të shuajë konfliktet, jo të jetë iniciator luftërash. Sipas tyre, sulmi i bërë nga SHBA-ja ndaj ish-gjeneralit iranin ishte i justifikuar pikërisht për këtë arsye.
“Shqipëria është një vend i vogël dhe nuk do mënd që nëse do kishte një luftë do prekej direkt. Por, nuk ka për të ndodhur gjë. Amerika është në gjendje që t’i stabilizojë gjërat. Është shteti më i fuqishëm i planetit.”
“Nëse do të kishte një konflikt të madh, Shqipëria do të ishte e sigurt. Sepse kemi në krah Amerikën.”
“Sa të rrojë Amerika nuk ka vend më të sigurt se Shqipëria. Këtu është vendi i NATO, këtu të fluturojë një mizë, e kap Amerika në ajër. Amerika është më e sofistikuara në botë për të ndalur luftërat. Nuk ka asnjë tjetër para saj për të ndaluar luftërat. Amerika është ‘baba’ i botës dhe Gjermania është ‘baba’ i Europës.”/ TIRANA TODAY
