Vizitën e tij të parë zyrtare si kryeministër i Kosovës, Avdullah Hoti ka zgjedhur ta bëjë në Tiranë. Vizita e tij pason pas asaj të mbajtur më herët nga kreu i qeverisë Edi Rama në Prishtinë, në lidhje me aktakuzat e ngritura nga Prokuroria Speciale ndaj Hashim Thaçit dhe Kadri Veselit për krime lufte.
Kryeministri Edi Rama zhvilloi një konferencë me homologun e Kosovës, ku tregoi se për çfarë kanë rënë dakord.
“Jemi dakordësuar për të përcaktuar një afat të ri për mbajtjen e mbledhjes së Shkodrës mes dy qeverive, me shpresën që situata jo e lehtë lidhur me COVID të na e mundësojë në gjysmën e dytë të shtatorit.
Jemi dakordësuar edhe për një tjetër event të rëndësishëm, që do të zhvillohet për herë të parë mes nesh, me shpresë se situata do të na e mundësojë në nëntor. Ku dy qeveritë të sponsorizojnë kongresin e parë të autoriteteve vendore, që dëshirojmë të kthehet në një kongres tradicional, ku kryetarët e bashkive dhe komunave, sikur quhen në Kosovë, të ndajnë praktikat e mira, sfidat e përbashkëta në adresimin e problemeve komunitare dhe potencialin e nismave të përbashkëta”, tha ai.
