Pas paralajmërimit të ministres Manastirliu për “Green Pass”, në të njëtën linjë qëndron edhe kryeministri Rama, teksa vë në dukje se me gjasë të pa vaksinuarit do të kenë kufizime në mjediset publike.
Kreu i qeverisë, me anë të një postimi në rrjetet sociale, inkurajon të pa vaksinuarit që të mbrojnë veten dhe të tjerët. Në të kundërt do të përballen me disa pengesa, sikundër në shumë vende të botës, ku nuk mund të kesh akses pa bërë vaksinën.
Rama i bën apel të pa vaksinuarve që të marrin dozën e parë dhe të dytë pa humbur kohë, teksa ka publikuar një spot në të cilin thuhet se sot ka një zgjidhje për të shpëtuar nga pandemia, e ajo është vaksina.
Statusi
“MIRËMËNGJES
dhe me ftesën për të pavaksinuarit që të vaksinohen një orë e më parë, për të mbrojtur veten e për të mos u ndodhur jashtë mundësisë së aksesit në mjedise publike, nëqoftëse situata e dimrit do ta imponojë, ju uroj një fundjavë të mbarë”.
Më herët, Ministrja e Shëndetësisë dhe Mbrojtjes Sociale, Ogerta Manastirliu, gjatë një interviste televizive theksoi se vendosja me detyrim e “Green Pass” në shkolla për studentët, ka ndihmuar në rritjen e përqindjes së vaksinimit duke e çuar në 30%. Vendosja e “Green Pass” në bare dhe restorante do të vlerësohet si opsion, në varësi të ecurisë së situatës së pandemisë.
