Duket se një tjetër rrjedhë po merr ngjarja e rëndë që ka ndodhur gjatë natës në Tiranë, ku një i ri u vra nga një polic në Tiranë. Xhaxhai i Klodjan Rashës që u qëllua me armë zjarri nga efektivi i policisë në Tiranë, dhe humbi jetën në spital, është shprehur se nipi i tij ka qenë i sëmurë dhe se merrte mjekime. Ai ka deklaruar për mediat se nipi i tij ka dalë për të pirë një kafe, dhe se nuk ka pasur asnjë armë me vete, siç mund të pretendohej.
“Në fillim na thanë djali është arrestuar nga policia. Dhe ky ka shkuar sikur është arrestuar. Pastaj kanë thënë se djali ka bërë aksident me policinë.
Pastaj kanë thënë se ka vdekur. Ka dalë me pi një kafe, ka pasur dy kokrra hurma në dorë, i ka lënë në ballkon, ka dalë me pi një kafe. Kur na thanë ka vdekur. Përpara ka qenë i sëmurë, gjatë ditës ka qenë duke punuar. Çfarë armësh more zotëri? Baba i vetë ka qenë duke fjetur. Na thanë që është në morg. Nuk e kemi parë trupin.
Dhe në emër të vëllait, kërkojmë që kjo të zbardhet deri në fund. Vëllai më ka garantuar që djali nuk ka pasur absolutisht asgjë me vete. Se si ka ndodhur, se çfarë është bërë nuk dimë.
Besimin tek ju dhe nga shteti. Apeli për policinë të na e zbardhë deri në fund, sido që të jetë puna. Kërkojmë dhe nga ju që të na e zbardhni këtë punë”, deklaroi xhaxhai i viktimës.
Mësohet se i riu ka pirë kafe pranë banesës së tij, në orën 22:00. Klodian Rasha është qëlluar për vdekje nga efektivi i policisë në një “rrugicë qorre”, ku i riu ishte 100 metra larg shtëpisë së tij. Nuk dihet se çfarë ka bërë Rasha pak pas mesnate, atëherë kur është qëlluar për vdekje nga efektivi i policisë.
Efektivi i policisë e ka qëlluar me armën e shërbimit. Ndonëse u dërgua me urgjencë në spital, 25-vjeçari nuk u mbijetoi plagëve të marra.
