Ish-deputetja e PD-së, Grida Duma është shprehur se tërmeti mund ta ndihmojë Shqipërinë që të jetë në fokusin e BE-së, sa i përket negociatave.
E ftuar në emisionin “Kjo Javë” në News24, Duma thotë që shikon sinjale pozitive për hapje të negociatave. Sipas saj, solidariteti evropian do të vijë nga gjendja e rëndë që vjen nga Shqipëria.
“Ndoshta ky moment bën që Shqipëria të jetë në fokus të investimeve nga BE. Unë mendoj se Macron ka një filozofi të tijën personale për BE. Atë që Macron nuk pranon faktin që Shqipëria të jetë vendi i dytë në botë për sa i takon azilantëve politikë. Fajin nuk e kanë njerëzit që kërkojnë azil, por ata kaq mundësi kanë. Gangrena vjen nga pasiguria. Unë besoj se simptoma e pasigurisë është më e madhe sesa ajo e varfërisë.
Unë shikoj sinjale pozitive për hapje të negociatave. Unë besoj se solidariteti evropian do të vijë nga gjendja e rëndë që vjen nga Shqipëria. Ndoshta tërmeti ishte kostoja që Shqipëria të ndihmohet nga BE-ja. Opozita do të kompensojë familjet e prekura. Po ashtu, opozita ka dërguar në terren edhe grupe, të cilat kanë marrë konstatime për shumë raste që nuk janë ndihmuar nga qeveria. Opozita po gjendet në të gjitha zonat dhe po inspekton vazhdimisht. Opozita po bën balancën dhe duhet ta bëjë patjetër balancën jo vetëm në rast katastrofash”, tha ajo.
Ish-deputetja shton se ndërtesat e shkatërruara duhet të ishin vend krimi dhe se Prokuroria në këtë rast duhet të kishte vepruar më shpejt.
“Në momentin që kishim humbje jete, godinat që u rrëzuan konsiderohen vendngjarje e krimit, por duhet të kishte vepruar që në momentin ep arë dhe nuk veproi. Nëpërmjet një fatkeqësie nuk duhet të fshehim një tjetër”, deklaroi ajo.
