Përplasja e hapur mes kryeministrit Edi Rama dhe kryetarit të bashkisë Konispol, Erges Dule, ka marrë një tjetër kthesë të fortë, pasi ky i fundit ka refuzuar publikisht të zbatojë urdhrin e shefit të qeverisë për largimin në masë të drejtorëve të bashkive.
Pas paralajmërimit të Ramës se “nëse nuk i shkarkon, atëherë jepe vetë dorëheqjen”, Dule ka reaguar me një postim të gjatë në rrjetet sociale ku sfidon vendimin dhe mbron drejtorët dhe administratën e tij.
Në Konispol ju siguroj se gjenden përkushtimi, dashuria për vendin dhe çdo ditë bëhet punë. A mjaftojnë këto? Sigurisht që jo. Por s’ka vend për frikë nëse punohet ndershmërisht”, shkruan ai.
Në komentin e tij, Dule rendit disa nga arritjet e bashkisë nën drejtimin e tij, duke përmendur pastrimin e territorit, shuarjen e zjarreve, ndriçimin 100% të qytetit, projektet infrastrukturore dhe ndihmën ndaj qytetarëve për aplikime online.
Por përtej mbrojtjes së drejtorëve, Dule pranon se jo të gjithë punonjësit janë të përkushtuar, duke i hedhur fajin atyre që nuk kanë pasion dhe përgjegjësi për vendin që shërbejnë. Kjo deklaratë bie në kontrast me mbrojtjen që ai u bën drejtorëve, të cilët, sipas Ramës, duhet të largohen për t’i dhënë frymë të re administratës vendore.
Dule mbyll reagimin e tij duke i kërkuar qytetarëve që të shprehin lirshëm mendimet për administratën e Konispolit dhe të kontribuojnë në rritjen e cilësisë së shërbimeve publike.
Përplasja vjen në një kohë kur kryeministri ka nisur një fushatë për pastrimin e administratës vendore, duke kërkuar shkarkimin e të gjithë drejtorëve të bashkive si pjesë e një reforme të thellë në qeverisjen lokale. Rasti i Konispolit mund të sinjalizojë një çarje të parë publike mes Ramës dhe disa kryetarëve të bashkive.
