Sekretari i Përgjithshëm i PD-së, Gazment Bardhi, ka replikuar me kryetaren e LSI-së Monika Kryemadhi, sa i takon koalicioneve për zgjedhjet e 25 prillit. Kryemadhi e cilësoi Bardhin mashtrues pervers, por numri dy i PD-së tha sot se deklarata e kryetares së LSI-së është e pakuptimtë. Qëndrimet publike nga palët, dëshmojnë për një thellim të ndarjes mes PD-së dhe LSI-së.
“Kryesia nuk është mbledhur, sepse nuk ka pasur një dakordësi nga kryetarja e LSI-së për të pasur mundësi t’i propozohej Kryesisë një listë të përbashkët. Qëndrimi konstant i LSI-së ka qenë që duhet të dilnim në dy lista, pavarësisht qëndrimit tonë për një listë. Qëndrimi krejt normal sipas vlerësimit të tyre, ishte se do të maksimalizonin votat me dy lista.
LSI tha se me ndryshimet e njëanshme të Kodit përfitonte sepse nga 19 mandate në 2017 do të merrte më shumë se 40 mandate nga ndryshimet e njëanshme kushtetuese që bëri Edi Rama. Në fakt ato ndryshime të njëanshme të Ramës ishin një dhunim flagrant. Ka një deklaratë të pakuptimtë të kryetares së LSI-së”, tha ai.
Edhe nënkryetari i LSI-së, Petrit Vasili, përgënjeshtroi deklaratën e Sekretarit të Përgjithshëm të PD-së, Gazment Bardhi, se i kanë bërë ftesë LSI-së për ndarjen e mandateve.
Ish-kandidatja e LSI-së në Durrës, Elona Guri, akuzoi Bardhin se nuk pranoi që të bënte një konferencë kundër Suel Çelës gjatë periudhës së fushatës në Elbasan. Por sekretari i Përgjithshëm i PD-së e injoroi dhe sulmoi hapur Kryemadhin.
“Nuk e njoh fare kush është zonja (për Elona Gurin). Unë kam dhënë me dhjetëra konferenca për shtyp, janë publike. Ato që u fshehën dhe nuk erdhën një ditë në qarkun e Elbasanit, edhe pse drejtuan qarkun e Elbasanit janë arsyeja e vetme pse LSI-ja nuk arriti të merrte asnjë mandat në qarkun e Elbasanit. Ju e dini që LSI-ja nuk ka bërë fushatë në Elbasan”, tha ai.
