Presidenti Meta është pyetur nga gazetarët nëse ambasadorja e SHBA, Yuri Kim, e ka cënuar sovranitetin kombëtar me kërcënimin për Berishën. Ai ka nënvizuar se qytetarët nuk duhet të jenë viktimë e arbitrariteteve e kulisave, dhe të jenë përballë faktit të kryer.
Presidenti Ilir Meta e cilësoi ish-kryeministrin Sali Berisha “si vera”. Sipas tij, sa më shumë vite kalojnë, aq më shumë demokrat bëhet.
“Së pari, sovraniteti është respektim i vullnetit të qytetarëve. S’ka mbrojtës më të mirë të sovranitetit kombëtar, se sa vetë sovrani, vetë qytetari. Sigurisht kur ai është i ndërgjegjshëm për votën e tij, kur e mbron, nuk e shet, nuk e tregton.
Sa i takon sovranitetit, padiskutim që fjala kyç për dekadat që vjen është sovranitet. Që nuk do të thotë mospërmbushje të detyrave të Shqipërisë ndaj NATO-s ku jemi anëtarë prej kohësh apo BE, ku dëshirojmë të anëtarësohemi. Me gjithë detyrimet tona në raport me institucione e organizata, i kemi të fiksuar qartë në Kushtetutën e Republikës së Shqipërisë.
Besoj se në radhë të parë është e rëndësishme ti kthejmë sovranitetin qytetarëve. Ata mos injorohen e përjashtohen më, mos vendosen para faktit të kryer, mos jenë më viktimë e arbitraritetit e kulisave që kanë kërkuar e kërkojnë ta nxjerrin këtë sistem jashtë. Është bërë një hap me 25 prillin, por hapa të tjerë do të ndodhin në të ardhmen”, u shpreh Meta.
Ambasadorja amerikane Yuri Kim deklaroi në një intervistë për ‘Zërin e Amerikës’, se kush thotë se është habitur nga vendimi i Departamentit amerikan të Shtetit për ish-kryeministrin Berisha, nuk është shumë i sinqertë. Ajo ka thënë se kur dikush përcaktohet nga Sekretari i Shtetit për korrupsion, zakonisht është shumë e dukshme.
