Kreu i Shtetit, Ilir Meta, ka komentuar për herë të parë në lidhje me nismën e ish-kryeministrit Berisha dhe rikthimin në PD. Meta ka thënë nga Korça se doktor Berisha është si vera; sa më i vjetër aq dhe më tërheqës e demokrat bëhet. Meta është distancuar nga vendimi i Bashës për Berishën, duke theksuar se nuk është detyra e tij si president të merret me këto çështje.
”Nuk dëshiroj të merrem me çështje të tilla, sepse nuk është kjo detyra ime, sigurisht që Berisha nuk mund të rri të them, doktori është si vera. Sa më i vjetër, aq dhe më tërheqës e demokrat bëhet”, tha Meta.
Ish-kryeministri Sali Berisha është zyrtarisht jashtë grupit parlamentar të Partisë Demokratike.
Pasi kryedemokrati Lulzim Basha e përjashtoi nga grupi parlamentar i Partisë Demokratike, ish-kryeministri Berisha njoftoi një tur takimesh në mbarë vendin, me qëllim sipas tij, rikthimin e sovranitetit partisë më të madhe opozitare në vend.
Ndalesa e parë e këtij turi ishte në Tiranë, aty ku pasditen e djeshme mbajti një takim me anëtarët e PD. Berisha ka hedhur akuza të forta në drejtim të Bashës, duke e cilësuar atë si humbës kronik.
“PD në gjendjen më kritike të ekzistencës së saj, kur nuk ka qenë në këtë gjendje, ka 8 vjet që ka humbur çdo nismë përveç ligjit të dekriminalizimit, ka 8 vjet që ka humbur çdo aksion 100%, ka 8 vite që kalon nga disfata në disfatë”, tha ai.
Berisha e ka cilësuar Lulzim Bashën një lider të thyer, dhe për këtë dha argumentet e tij. “2019-21 mund ta keni venë re se kam bërë gjithçka për lartësimin e tij për të dalë fitimtarë PD, por ama kompanisë së huaj që punonte për fitoren tonë i kam thënë meqë po më pyesni, zotëria është lider i thyer”.