Pas njoftimit të një dite më parë nga ana e kryeministrit Rama, bëhet me dije se kanë mbërritur në Presidencë emrat e dy ministrave, Çuçi dhe Ekonomi.
Mëngjesin e sotëm, kanë mbërritur në Institucionin e Presidentit të Republikës emrat e dy ministrave të rinj, me propozim të kryeministrit Rama, të cilët kërkojnë miratimin e Kreut të Shtetit për të marrë detyrën.
Pak çaste më parë, deputetja e Partisë Socialiste, njëkohësisht e propozuara për ministre të Bujqësisë, Milva Ekonomi, e ka konsideruar një përgjegjësi shumë të madhe emërimin në këtë post. Në fjalën e saj të parë pas këtij propozimi, Ekonomi tha se tashmë është në dorë të presidentit për dekretimin e saj.
Kryeministri Edi Rama zbuloi dje pas gjashtë ditësh pritje, emrin e ri të ministrit të Brendshëm, Bledi Çuçin. Gjithashtu Milva Ikonomi do të zërë vendin e Çuçit, duke u emëruar ministre e Bujqësisë.
Rama i quan Çuçin dhe Ikonomin “dy bashkëpunëtorë të përkushtuar në çdo detyrë që kanë kryer këto vite, me integritet, profesionalizëm dhe kulturë qytetare e politike të padyshimtë”.
Sandër Lleshaj dorëzoi dorëheqjen pas tre ditësh protesta të dhunshme, pas vrasjes së 25-vjeçarit Klodian Rasha nga një polic në detyrë.
