Kryetarja e LSI-së, Monika Kryemadhi në fjalën e saj pas protestë nga selia e partisë falënderoi të gjithë protestuesit që morën pjesë në tubimin masiv, që sipas saj ishte më i madhi në histori.
Kryemadhi u shpreh se policia me urdhër të Ramës kishte tentuar me çdo formë të ndalonte protestuesit nga rrethet, duke gjobitur shoferët e autobusëve. Por ajo premtoi se atyre do tu ktheheshin lekët një më një mbrapsht.
“Falënderoj të gjithë protestuesit që u bënë pjesë e kësaj proteste model, që përballuan një nga protestat më të mëdha që ka pasur Shqipëria në këtë periudhë tranzicioni dhe thyen frikën. Falënderoj të gjithë ata shqiptarë që janë larguar dhe u qanë shpirti për të parë fëmijët e tyre. Për të gjithë ata prindër që nuk mundën të jenë sot në këtë protestë.
Falënderoj shoferët e autobusëve që pavarësisht presionit të policëve të Edi Ramës që i gjobitën dhe i kërcënuan. Por u bëj thirrje të mbajnë faturat pasi do ti marrin lekët një më një mbrapsht. Falënderoj gazetarët që na kanë mbështetur në çdo moment edhe ata policë që u treguan dashamirës me ne. Por u bëj thirrje të kenë kujdes atyre që iu japin urdhrat për të hedhur gaz lotsjellës dhe të nxisin dhunë pasi do të përgjigjen për të gjitha para ligjit.
Rama u largua edhe sot, pasi ai tashmë është i larguar, ka dështuar. Shqipëria është i vetmi vend ku është shtëpia e shqiptarëve ku mund të ndërtojnë të ardhmen e tyre,” u shpreh Kryemadhi.
