Për më shumë se 3 orë opozita ka protestuar para Parlamentit. Edhe pse ishte një protestë e paplanifikuar, përsëri protestuesit ishin të lartë në numër. Sikundër në protestën e datës 16 shkurt, edhe sot nuk munguan tensionet e përplasjet me policinë. Protestuesit nisën të hedhin tymuese, shashka, shishe, gurë, të djegin goma. Si edhe tentuan të hyjnë në Parlament duke shtyrë kordonin e policisë.
Kjo gjë bëri që policia t’i përgjigjej duke hedhur gaz lotsjellës për të shpërndarë protestuesit. Kjo gjë bëri që shumë prej protestuesve, si edhe gazetarë të lëndoheshin. Gjatë kohës që policia hodhi gaz lotsjellës, një pjesë e protestuesve u larguan në drejtim të Rrugës së Elbasanit.
Dhe në shenjë revolte thyen xhamat e makinës së shefit të Trafikut Urban në Tiranë, Taulant Gjoka. Duke e goditur me gurë, hedhur tymuese, si edhe një nga biçikletat që Bashkia ka vënë në dispozicion të qytetarëve.
Thirrjet e protestuesve kanë qenë kundër qeverisë, duke kërkuar largimin e Edi Ramës. “Do fitojmë apo jo?”, “Edvin, kazan, legen”, “Qeveri e krimit”, shprehje këto të përdorura edhe nga opozita.
Edhe pse policia hodhi vazhdimisht gaz lotsjellës, protestuesit ishin të vendosur për të qëndruar para Parlamentit, deri në përfundimin e seancës plenare. Menjëherë më pas, Basha mbylli edhe protestën. Gjatë fjalës para simpatizantëve tek selia e PD-së, Lulzim Basha akuzoi policinë se ushtroi dhunë. Si edhe bëri të ditur që ky është vetëm fillimi dhe se do të ketë mosbindje civile nga jugu në veri.
Ndërkohë ish-kryeministri Berisha në një prononcim për Tirana Today u shpreh se qeveria Rama ka përdorur mjetet e fundit si të parat për të ndaluar protestën.
Deputeti i LSI, Petrit Vasili tha për Tirana Today se gazi lotsjellës është një lëndë luftarake që edhe kundër armiqve kufizohet. Me këto veprime qeveria ka kaluar kufirin e durimit të protestuesve dhe opozitës.
Protesta është mbyllur me protestuesit të cilët vazhduan të hidhnin tymuese, shashka dhe të djegin disa nga pankartat. Pas largimit të tyre drejt selisë së PD-së, policia rrethoi sheshin para Parlamentit për të vazhduar hetimet. Ku në vendngjarje erdhën edhe ekspertë të kriminalistikës, prej ku pritet të ketë edhe arrestime të protestuesve.
E konfirmuar kjo edhe nga kreu i Grupit Parlamentar të Partisë Socialiste Taulant Balla. Balla theksoi se protestuesit janë identifikuar dhe se nesër policia do bëjë të ditur emrat e atyre që kanë përdorur dhunë. Dhe se ata do marrin ndëshkimin e merituar./ TIRANA TODAY
