Mediat e huaja kanë publikuar një video nga baza ajrore amerikane Al Asad, ku tregohen dëmet e shkaktuara nga sulmet e Iranit.
BBC sjell pamje brenda kësaj baze me siguri të lartë, duke dhënë edhe rrëfimet e disa prej ushtarëve të cilët i mbijetuan sulmit. Akeem Ferguson ishte në një bunker kur ekipi i tij mori lajmin drithërues se 6 raketa balistike iraniane ishin nisur në drejtimin e tyre.
“Mbaja armën time dhe e vura kokën poshtë dhe u përpoqa të gjej një vend të përshtatshëm, kështu që fillova t’u këndoja vajzave të mia, brenda kokës time. Dhe unë vetëm prisja. Unë isha 100% gati për të vdekur”, tha ai.
Sulmet në bazat amerikane erdhën pas atentatit që SHBA bëri ndaj gjeneralit iranian, Qassem Soleimani. Ai u vra në një sulm me dron amerikan, teksa gjendej në një kolonë në aeroportin e Bagdadit.
Autoritetet iraniane thuhet se do të ofrojnë një shpërblim prej 80 milionë dollarësh për kokën e presidentit amerikan Donald Trump. Sipas mediave, kjo “ofertë” është bërë gjatë transmetimit televiziv të funeralit nga transmetuesit zyrtarë shtetërorë.
Irani ka bërë të ditur se nuk do të respektojë me asnjë kufizim të marrëveshjes bërthamore të vitit 2015.
