Kryeministri Edi Rama ka ashpërsuar gjuhën ndaj BE-së, në lidhje me mos liberalizimin e vizave të Kosovës. Në konferencën e përbashkët mes tij dhe kryeministrit të Kosovës, Avdullah Hoti, Rama tha se është një turp për BE-në që e mban peng këtë popull dhe nuk i lë të lëvizin të lirë. Ai deklaroi më tej se arsyeja nuk gjendet në Kosovë, pasi detyrimet janë përmbushur. Teksa ka vendosur pikat mbi ‘i’, ai shtoi më tej se arsyeja është në Europë dhe në arsyet e brendshme të BE-së.
“Ne nuk marrim vendime për Kosovën, ne flasim për Kosovën dhe jo në emër të saj. Harmonizimi është domosdoshmëri. Është turp për BE-në që mban peng një popull që të lëvizë lirisht, pasi si shtet i ka plotësuar të gjitha detyrimet për liberalizimin e vizave. E dimë shumë mirë pse. Arsyeja nuk gjendet në Kosovë, detyrimet janë përmbushur dhe janë njohur.
Arsyeja është në Europë dhe në arsyet e brendshme të BE-së. Kur marrin vendime për ne, nisen nga kalkulimet për qëndrueshmërinë elektorale të forcave që qeverisin. Turp është që Kosova nuk lëviz e lirë”, tha Rama.
