Organi i akuzës, ka dhënë së fundmi sinjale se është zgjuar nga “gjumi” disamujor. Ka zgjatur hetimin ndaj ish-titullarit Adriatik Llalla për pastrim parash, ka marrë të pandehur ish-ministrin e Brendshëm Saimir Tahiri. Kryeprokurorja e përkohshme Arta Marku, ka kritikuar punën e dobët të prokurorëve në Tiranë dhe rrethe.
Në këtë valë, pritet të ketë zhvillime me dosjen e kryebashkiakut të Durrësit, Vangjush Dako, apo të Dibrës, që të dyja me akuzën e blerjes së votave. Gjithashtu kreu i PD, Lulzim Basha, po merret në pyetje mbi origjinën e parave për kompaninë lobuese në SHBA. Fakti që këto lëvizje, përkojnë me ngritjen e SPAK, që do merret ekskluzivisht me zyrtarët e lartë, jep shpresë se diçka më në fund do të fillojë të lëvizë për mbarë.
Por lëvizjet, përkojnë edhe me fushatën e hapur për kryeprokurorin e ri, që do të ketë një mandat 7-vjeçar. Marku është ndër pretendentët kryesore, ndaj ka interes të dëshmojë një zell edhe më të madh në kryerjen e detyrës. Ajo synon të legjitimohet sidomos në sytë e faktorit ndërkombëtar. Problemi me fushatat, është se ajo kanë objektiva të caktuara qartë, se deri ku do të shkohet, se kush do preket, dhe kush jo.
Tahiri që po e ndjen se mund edhe t’i bëjë disa muaj burg, përsëriti sot se mund të detyrohet të flasë për ata, që e kanë katandisur në këtë derexhe. Me përjashtim të videos së Dritan Priftit, prej 28 vitesh këtu politikanët kanë shantazhuar njëri-tjetrin, pa i hedhur të gjitha kartat në tavolinë. Mbetet të shohim nëse drejtësia e re, do t’ua fusë disave këmbët në një këpucë, apo peshqit e mëdhenj do të dalin sërish të larë, dhe burgjet do të vazhdojnë të mbushen me fukarenj, trafikantë dhe vrasës ordinerë./ Tirana Today
