Braktisja e mandateve nga deputetët e opozitës solli një krizë politike në vend, që po vijon me protesta të njëpasnjëshme. Tashmë opozita e bashkuar insiston në kërkesën e saj për largimin e kryeministrit Rama, që i hap rrugë krijimit të një qeverie tranzitore e më tej, mbajtjes së zgjedhjeve të parakohshme.
Por, pas djegies së mandateve, në Kuvend kanë hyrë deputetë të tjerë, të cilët kanë marrë mandatin pas dorëzimit të formularëve në Komisionin Qendror të Zgjedhjeve, duke krijuar më tej grupet parlamentare respektive.
Deputetët e rinj janë cilësuar si tradhtarë nga Basha e Kryemadhi, ndërsa vetë ata shprehen se detyrën që u kanë besuar qytetarët me vota, do e ushtrojnë në Kuvend, duke u përballur me mazhorancën.
Në takimet e herëpashershme që liderët e opozitës zhvillojnë, shprehen se “qytetarët do i tregojnë vendin Ramës duke e larguar atë, për të sjellë një risi në jetën politike, pushtetin të përqendruar tek populli dhe jo në duart e oligarkëve”.
Nga ana tjetër, kryeministri Rama ka thënë se nuk është detyra e qeverisë të bindë opozitën të hyjë në zgjedhje, ndërsa i është përgjigjur Bashës dhe Kryemadhit se zgjedhjet e qershorit do të mbahen, me apo pa pjesëmarrjen e tyre.
Por, të gjitha këto zhvillime politike në një qark kohor të shkurtër, si kanë ndikuar në opinionin publik?
Tirana Today ka pyetur qytetarët me anë të një sondazhi, se cilën parti do të votonin ata në rast se zgjedhjet do të mbaheshin sot.
Në këtë sondazh me 3232 votues, rezulton se:
- PS do të fitonte zgjedhjet (1408 vota)
- Qytetarët bojkotojnë në masë zgjedhjet (839 vota)
- Bie numri i votuesve të PD-së (667 vota)
- LSI humb ndjeshëm votuesit (59 vota)
Siç shihet edhe në diagramën e mëposhtme, numri i qytetarëve që zgjedhin të bojkotojnë zgjedhjet, pra shprehin pabesi ndaj të gjitha palëve politike, është mjaft i madh. Kështu, pyetjes se “cilën parti do të votonit”, plot 839 qytetarë, ose 26% e votuesve iu përgjigjën me opsionin “Nuk do të votoja”.
Vota këto që kanë kaluar madje edhe numrin e votuesve të forcës politike të dytë më të madhe në vend, Partisë Demokratike.
Nga 3232 votues, e djathta do të votohej vetëm nga 20.64% e tyre, teksa ka marrë vetëm 667 vota. Nga ana tjetër, edhe më problematik është rezultati i votuesve të LSI-së, teksa shohim një rënie të ndjeshme të numrit të votuesve, në proporcion me numrin e votuesve të partive të tjera.
Kështu, LSI e drejtuar tashmë nga Kryemadhi, ka marrë vetëm 59 vota (1.83%) nga 3232 në total.
259 votues, ose 8% e totalit, do të votonin një parti tjetër.
Kujtojmë se aleanca mes PD-së dhe LSI-së është kritikuar ndjeshëm, teksa në rrjetet sociale janë publikuar edhe video të liderit të djathtë, teksa ka sulmuar publikisht LSI-në vite më parë , me të cilën sot kërkon të rrëzojë Ramën.
Po ashtu, e djathta duket se është përçarë, teksa Basha përzuri nga PD të gjithë demokratët ‘e vjetër’, tashmë kritikë të tij, ndërsa vetëm pak ditë më parë Patozi krijoi partinë “Bindja Demokratike”.
Nuk dihet nëse këto arsye kanë zbehur elektoratin e demokratëve, ndërsa ajo që mund të thuhet në bazë të këtij sondazhi, është se numri i të zhgënjyerve përgjithësisht nga politika në Shqipëri dhe që do të bojkotonin zgjedhjet, është rritur ndjeshëm./ Tirana Today
