Prej muajit shkurt, opozita e bashkuar ka mbajtur disa protesta masive. Me braktisjen e mandateve, PD dhe LSI duket se u janë dedikuar plotësisht protestave, teksa bëjnë thirrje për bashkimin e shqiptarëve, në mënyrë që të rrëzojnë Ramën.
Tashmë opozita kërkon largimin e kryeministrit, por jo vetëm: krijimin e një qeverie tranzitore dhe zhvillimin e zgjedhjeve të parakohshme. Të gjitha protestat janë shoqëruar me tensione të shumta, madje ka pasur edhe të plagosur nga radhët e protestuesve, por edhe nga radhët e policisë.
Protestuesit kanë tentuar që të prishin kordonin e punonjësve të policisë, duke hedhur shashka e tymuese si dhe duke shkaktuar edhe përplasje mes tyre. Nga ana tjetër, punonjësit e policisë janë përgjigjur me gaz lotsjellës, ujë me presion si dhe me bomba tymi.
Tirana Today ka pyetur qytetarët, se si e konsiderojnë reagimin dhe qëndrimin e policisë në protestat e opozitës. Siç duket më poshtë, shumica e votuesve të këtij sondazhi mendojnë se policia ka mbajtur një qëndrim të gabuar.
Pra, pyetjes “Si e gjykoni qëndrimin e policisë në protestat e opozitës”, rreth 72% e votuesve iu përgjigjën me opsionin “Të gabuar”.
20% e votuesve mendojnë se qëndrimi ka qenë korrekt, duke votuar opsionin “Të drejtë”, dhe 7.8% zgjodhën opsionin “Nuk e di”.
