Kryedemokrati Basha ngriti alarmin se dy spitalet COVID janë tejmbushur me të sëmurë, ndërsa spitali COVID 3, sipas tij është iluzion. Në një konferencë për mediat, ai bëri përgjegjës për situatën kryeministrin Edi Rama, ndërsa i bëri thirrje mjekëve që të reagojnë.
Teksa shigjetoi kryeministrin Rama, kreu i PD-së u shpreh se ai nuk ka asnjë plan, ndërsa thirrja e ditëve të fundit është për maskë, një gjë që për të është e papërballueshme për buxhetin e shqiptarëve.
Në vazhdën e akuzave, Basha u shpreh se infektimet janë rritur, dhe testimet kanë rënë. Kreu i PD-së u është drejtuar mjekëve që të mos heshtin, në të kundërt janë bashkëpërgjegjës për këtë situatë.
“Spitali COVID 3 nuk ka asnjë investim, nuk ka spital COVID 3, por vetëm propagandë. Ndërkohë që sipas ekspertëve, numri i të infektuarve është rritur me 30% në 10 ditë. Kolapsi i sistemit shëndetësor për të përballuar shtrimet në spitale është realitet, jo paralajmërim.
Kriza e rëndë ka përfshirë çdo sistem të ekonomisë, që i ka bërë të varfrit të mjerë, shtresën e mesme të varfër. Sot po flasim për diçka dhe më akute, për shëndetin. Nuk ka marrë asnjë masë për këtë situatë që ka trokitur në derë. I është rikthyer ritualit të dërdëllitjeve, ndërsa për COVID ka vetëm një fjalë: “vini maskën”.
Ndërkohë që një në tre shqiptarë nuk ka lekë ta paguaj. Nuk ka asnjë zgjidhje, asnjë masë, asnjë plan. Ka folur për një paketë të tretë, por s’ka paketë të tretë.
Ka braktisur shëndetësinë, mjekët. Kemi theksuar që të merren masa për testime masive dhe sot është ‘Zëri i Amerikës’ që thotë se infektimet janë rritur me 15%, testimet kanë rënë, kjo është neglizhencë. Eshtë për ndjekje penale, por do ketë kohë për këtë. Rëndësi maksimale ka që të lërë dërdëllitjet dhe konferencat fiktive për shtyp, dhe të marrë masa për shëndetësinë.
Janë të parët për të vjedhur, për shëndetësinë mjaftohen me “vër maskën pse të vura gjobën”. Duhet të forcohet roli i mjekëve të familjes, dhe ata duhet të pajisen me masa mbrojtëse.
Përfshirja e mjekut të familjes do të thotë që ku ta zgjidhi qesen e t’i japi lekë mjekut të familjes. Dy spitalet COVID i ka plot, spitalet rajonale i ka jashtë funksionit, ç’a do bëjë ky? Do presi të infektohen të gjithë shqiptarët? Kjo është kriminale.
I kërkoj mjekëve dhe atyre fytyrave të njohura, të mos heshtin, ndryshe janë bashkëpërgjegjës për këtë masakër të heshtur, që ka përgjegjës vetëm një njeri që nuk ka marrë asnjë masë dhe pse është lajmëruar që kjo po vinte.
Duke qenë që COVID 3 ka mbetur iluzion, duhet urgjentisht të bëhet përgatitja për përkujdesje nga spitalet rajonalë për pacientët. Testimi i personelit mjekësor është lënë në mëshirë të fatit. Zonat ku përplasen personat e sëmurë, duhet të jetë me rrezikshmëri zero infektimi nga personeli shëndetësor”.
