Kryeministri Edi Rama ka reaguar pas komentit fyes të moderatorit të ZDF, Marcus Lanz ndaj shqiptarëve, duke i quajtur mashtrues.
Gjatë një debati të ashpër me ministrin gjerman të Transportit, gazetari i tha: “Tani ti je duke rënë në nivelin e lojës mashtruese të shqiptarëve?” Në një intervistë për një tjetër media gjermane ‘Bild’, Rama e cilësoi këtë deklaratë të moderatorit si të turpshme.
“Jam shumë i habitur që mund të dëgjosh një gjuhë të tillë në një kanal televiziv aq të njohur siç është ZDF! Nuk e di nëse ky është ndonjë gabim i pafajshëm apo ndonjë keq emërtim racist për shqiptarët si popull, por padyshim që është një shprehje e turpshme”, tha ai.
Debati:
Lanz: Për të gjithë, apo për të huajt? Pikërisht kjo është çështja!
Scheuer: Sigurisht që për të gjithë.
Lanz: Tani, le të mos i tregojmë njëri-tjetrit përralla.
Scheuer: Unë kam një mendim ligjor ndryshe nga ai i ECJ. Unë i bashkohem Prokurorit të Përgjithshëm të CJEU.
Lanz: Tani ti je duke rënë në nivelin e lojës mashtruese të shqiptarëve.
Kjo deklaratë e tij u shoqërua edhe me duartrokitje.
Kryeministri Rama në deklaratën e tij dhënë për Bild tha se: nuk është hera e parë dhe nuk ka për të qenë e fundit që shqiptarët bëhen shënjestra e gazetarëve përtacë, por kur vjen nga një kompani mediatike kaq shumë e respektuar si ZDF, nëpërmjet dikujt me reputacionin e veçantë të Lanz, padyshim që të lëndon shumë.
Një ndjesë në emision do ta paraqiste si një gabim të pafajshëm, ndërkohë që e kundërta do të ishte shumë më lënduese edhe se vetë shprehja e turpshme”.
Pavarësisht devijimit nga ana e Lanz, Edi Rama do të vazhdojë me vizitën e tij në Berlin.
“Kancelarja Merkel është pionierja e Europës dhe një figurë frymëzuese për të gjithë ne që po luftojmë fort që një ditë t’i bashkohemi Europës duke reformuar vendet tona kandidate në Ballkanin Perëndimor dhe duke i ndryshuar ato për mire. Kështu që takimi me të është një gëzim dhe një nder special, por këtë here është edhe shumë i rëndësishëm për mua si kryeministri i një vendi që i godit rëndë nga një tërmet shkatërrues nëntorin e kaluar”.
Dhe më tej: “Shqipëria është në pritje të një rezultati pozitiv nga konferenca e donatorëve për rindërtimin pas tërmetit, që do të drejtohet nga Ursula von der Leyen në Bruksel, më 17 shkurt. Kancelarja Merkel është treguar shumë dashamirëse me popullin shqiptar që nga momentet e para pas tragjedisë dhe unë do të kërkoj ndihmën e tyre që ta bëj konferencën e donatorëve një dritë shprese për të paktën 15 000 persona që kanë humbur shtëpitë e tyre”.
