Ministrja e Shëndetësisë, Ogerta Manastirliu, njoftoi në një deklaratë për mediat se 100 mijë teste të shpejta kanë mbërritur në Shqipëri.
Testimet do të nisin nga dita e hënë me kryeqytetin, ku është edhe vatra kryesore e Covid 19.
“Testimi do të nisë nga e hëna fillimisht në Tiranë. Kemi siguruar 100 mijë teste”, tha ajo.
“Dhjetori nuk do të jetë muaj i lehtë”, u shpreh Ministrja e Shëndetësisë, në komunikimin me mediat, për masat e marra për përballimin e epidemisë në vend.
“Të gjithë mjekë, infermierë, janë mbështetur me bonusin special nga qeveria që në momentin e parë të përballjes me këtë pandemi, një fond prej 8 mln eurosh janë vendosur për ta.
Kemi dyfishuar kapacitetet në shtretër, kemi 1600 shtretër në 4 spitalet Covid. Sistemi ynë shëndetësor kishte 200 respiratorë në fillim të pandemisë, ndërsa tani kemi 483 respiratorë të dedikuar në funksion të mbështetjes së terapive intensive.
Kemi terapi mjekimi e medikamente në varësi të protokolleve në asnjë dallim nga vendet e tjera, e falas për qytetarët. Qytetarët janë duke përfituar falas barnat.
Në funksion të kufizimit të përhapjes së infeksionit, kemi marrë masat në kohë për përfshirjen e testit të shpejtë. Kemi 4 laboratorë publikë.
Nga dita e hënë nis testi i shpejtë i anti-genit, njësitë vendore të kujdesit shëndetësor e bëjnë për qytetarët këtë gjë.
Testi i shpejtë është identifikues i acidit nukleik, ai identifikon anti-genin. Përdoret për qëllime diagnostikuese”, tha Manastirliu.
