Ndryshon protokolli/ Testi i antigenit kryhet 5 ditët e para të sëmundjes

Ekspertja e ISHP-së Silva Bino, në një deklaratë për mediat, ka sqaruar udhëzimin për kryerjen e testit të shpejtë. Në prezantimin e bërë sot bashkë me Ministren e Shëndetësisë Ogerta Manastirliu, Bino tha se testi i shpejtë duhet të bëhet brenda 5 ditëve që nga shfaqja e simptomave. Në rast se testi del pozitiv, ajo shtoi se duhet marrë si 100% i saktë.

“Testi i antigenit kryhet në 5 ditët e para të simptomave. Ky është një informacion që duhet të dihet. Nëse është pozitiv, ai është vërtetë pozitiv, mat ngarkesën virale. Përgjigjja del për 30 minuta. Kjo është lehtësi e madhe, sepse i jep direkt përgjigjen personit dhe lehtëson gjurmimin. Ky test do të na ndihmojë të plotësojmë disa elementë të punës sonë në terren. Po kryhen disa trajnime. Është test i njohur nga OBSH dhe i aprovuar nga FDA, pra është test që plotëson të gjitha cilësitë e saj”, tha ajo.

Ministrja e Shëndetësisë, Ogerta Manastirliu, deklaroi se nga e hëna do të nis përdorimi i testeve të shpejta të antigenit, për evidentimin e rasteve pozitive me COVID-19. Manastirliu u shpreh se do të nisë nga Tirana fillimisht, ndërsa janë siguruar 100 mijë teste.

Më pas ajo deklaroi se do të jenë dhe në njësitë vendore të kujdesit shëndetësor dhe më tej, nga 20 dhjetori në spitalet rajonale për evidentimin e rasteve të dyshuara si COVID.

“Përsa i përket përfshirjes së shpejtë të antigenit, kemi siguruar në kontratën e parë 100 mijë teste të shpejta të antigenit, që janë tashmë të disponueshme në vendin tonë. Testimi i shpejtë i antigenit do të nisë nga dita e hënë, fillimisht në Tiranë. Në fazën e parë, duke filluar nga dita e hënë fillon testi i shpejtë i antigenit, që do jetë i disponueshëm në gjithë njësitë vendore të kujdesit shëndetësor. Janë struktura që kryejnë testin e tamponit. Nga 20 dhjetori do të jetë dhe në spitalet rajonale”, deklaroi ministrja.