Viti 2019-të ka qenë një prej periudhave më të vështira për Shqipërinë, veçanërisht sa i takon jetës politike. Prej muajit shkurt kanë nisur protestat nga opozita të cilat u pasuan me dorëzimin e mandateve prej tyre. Dhe për një vit, Shqipëria është në një krizë të thellë politike. Edhe pse në një anë është qeveria e cila e mohon një gjë të tillë. E në anën tjetër, kemi një opozitë e cila ndodhet jashtë Parlamentit, pa asnjë funksion dhe asnjë aftësi për të ndryshuar situatën.
Ajo çfarë i ka shoqëruar shqiptarët gjatë gjithë vitit 2019-të ka qenë një zhgënjim dhe një lodhje nga kjo gjendje ku është futur politika. Dhe duket se kjo frymë do t’i shoqërojë edhe përgjatë vitit 2020, për sa kohë partitë nuk bëjnë asgjë për ta ndryshuar.
“Unë nuk kam shumë shpresa se politika do të ndryshojë. Sepse ata janë të gjithë njësoj dhe e kanë mendjen vetëm për veten dhe jo për popullin. Ne kemi pasur shumë besim te ky i gjati, por dhe ai doli si këta të tjerët.”
“Asnjë gjë nuk ka për të ndodhur, këtu janë të gjithë maskarenj.”
“Aman se ka 30 vite dhe asgjë nuk ka ndryshuar në këtë vendin tonë. Dhe as nuk ka për të ndryshuar ndonjëherë. Ndaj edhe unë nuk pres të ndodhë gjë gjatë 2020-ës. Madje më keq do jemi si popull.”
“Po të vazhdojë të jetë Edi Rama edhe gjatë 2020-ës, akoma pa bukë do vazhdojmë. Ose nuk do kemi më hiç fare bukë.”
“Nëse ndryshon Toka drejtimin e rrotullimit, atëherë do të ndryshojë edhe politika në 2020. Kështu ka qenë dhe kështu do të jetë. Dhe ajo që do të doja unë në 2020-ën nga politika është vetëm që mos ta bëjnë më keq se çfarë është.”
“Kriza do të zgjidhet dhe do të jenë socialistët që do ta zgjidhin. Sigurisht që ata do ta bëjnë më të mirë politikën edhe në 2020-ën.”
Të paktë janë ata qytetarë të cilët mendojnë se situata do të ndryshojë dh se ky ndryshim do të vijë pikërisht nga partitë politike. Madje ka dhe nga ata të cilët shprehen se vendi nuk ndodhet në krizë politike.
“Shumë mirë është politika, nuk kemi as krizë dhe asgjë.”
“Gjërat do të ndryshojnë kur të vihen njerëzit e aftë dhe të ndershëm. Ata që punojnë dhe e duan këtë vend. Dhe e kemi ne në dorë që t’i sjellim.”
“Unë jam pozitiv dhe mendoj se mund të ndryshojë. Po të bashkohet me opozitën që ndodhet jashtë Parlamentit, themi që do të rregullohet çdo gjë.”
“Po ndryshoi do jetë shumë mirë. Unë shpresa kam, se si i thonë asaj fjalës ‘shpresa vdes e fundit’. Dhe kështu si kanë vajtur punët, ne shqiptarëve vetëm kjo na ka mbetur.”/ TIRANA TODAY
