Shënohen 2 aksidente brenda pak minutash, humb jetën një person në Vlorë

Dy aksidente janë regjistruar pasditen e sotme në zona të ndryshme të vendit.

Mësohet se një aksident është shënuar në rrugën Orikum-Dukat, ku një fadromë ka përplasur për vdekje një 55-vjeçar. Ngjarja është regjistruar në afërsi të varrezave të fshatit Fushë Dukat.

Bëhet me dije se shtetasi Novruz Havaraj ka qenë duke ecur anash rrugës, në momentin që u përplas nga fadroma. Në lidhje me këtë ngjarje u shoqërua në polici drejtuesi i fadromës, Elton Rrapo.

Ndërkohë aksidenti tjetër mësohet të ketë ndodhur në afërsi të fshatit Çiflig në Korçë. Dy makina janë përplasur me njëra-tjetrën, duke lënë të plagosur 2 persona të cilët janë dërguar në spitalin rajonal të Korçës. Nuk dihet ende gjendja e tyre shëndetësore.