Rusia i ka bërë thirrje zyrtarëve të huaj që të mos bëjnë deklarata publike lidhur me detajet e rrëzimit të avionit ukrainas në Iran.
Nënsekretari rus i shtetit, Sergei Ryabkov u shpreh se duhet të presin mbylljen e hetimeve që të mësohet se cili është fajtori i vërtetë për këtë ngjarje.
“Ekspertët duhet të lejohen të analizojnë situatën dhe të vijnë në disa përfundime. Jam i bindur se në këtë fazë nuk ka asnjë arsye për të dhënë deklarata me zë të lartë”, tha ai.
Shtetet e Bashkuara argumentojnë se avioni ukrainas u qëllua nga një raketë iraniane, edhe pse gabimisht. Nga ana tjetër, Irani i mohon me forcë këto akuza.
SHBA bazohet tek një video e publikuar nga ‘New York Times’, që tregon një aeroplan duke u goditur nga një raketë dhe duke u përplasur në tokë.
Por iranianët e cilësojnë këtë video si të rreme.
