Grabitja e 10 milionë eurove në aeroportin e Rinasit, tregoi edhe njëherë se interesat e politikës dhe qytetarëve, janë të ndryshme. PD, PS, LSI dhe presidenti Meta, janë angazhuar me zell në betejën politike të radhës.
Qeveria ka nxituar të fajësojë koncensionarin kinez, që sipas saj nuk mori masat e duhura të sigurisë, sikurse i ishte rekomanduar. Edhe pse nuk e pranon se ngjarja e të martës, përbën një kërcënim të sigurisë kombëtare, qeveria dislokoi dje ushtrinë përreth aeroportit. Këtë lëvizje ka shfrytëzuar presidenti Meta, që si komandant i përgjithshëm ndihet i mënjanuar dhe kërkon shpjegime.
Në një linjë me të, janë Lulzim Basha dhe Monika Kryemadhi, që shohin tek grabitja një “kamardare shpëtimi” për kauzën e protestave, që nuk po gjen dot mbështetjen e ndërkombëtarëve. Ndërkohë qytetarët, janë të interesuar për bileta më të lira, në një nga aeroportet për momentin ndër më të shtrenjtit në rajon dhe Evropë.
Ata janë të interesuar të udhëtojnë edhe në avionë më të sigurt, nisur nga uljet emergjente të disa avionëve që kanë ndodhur vitet e fundit. Siguria kombëtare në këtë vend, është cenuar dhjetëra herë gjatë 3 dekadave të fundit, dhe gjithnjë për fajin e politikanëve, dhe jo të qytetarëve.
Disa vite më parë, qeveria pretendoi se rinegocoi disa pjesë të kontratës me koncensionarin. Por kjo nuk ka pasur efektet e pritshme, në uljen e çmimit të biletave. Ka ardhur koha, që interesi i qytetarit të jetë vërtet i pari./ Tirana Today