Referuar atentatit të djeshëm, është zbuluar se i plagosuri Preng Gjini, dikur ka qenë pjesë e Gardës dhe Policisë. Gazetari Spartak Koka ka hedhur dritë mbi disa detaje të pathëna më parë, lidhur me atentatin me eksploziv të ndodhur pasditen e djeshme në kryeqytet, ku mbeti i plagosur Preng Gjini.
Koka është shprehur në emisionin “Opinion” se Gjini në të shkuarën ka qenë pjesë e Policisë dhe Gardës. “Preng Gjini është i moshës 50 vjeç. Ka shërbyer në strukturat e Policisë dhe Gardës së Republikës, disa vite më parë”.
Preng Gjini mbeti i plagosur rëndë, si pasojë e shpërthimit të makinës së tij, gjë që dyshohet se ka ndodhur për shkak të një lënde plasëse. Ngjarja ndodhi pasditen e djeshme mbi urën e ish-NISHARAK-ut në kryeqytet. Makina ka shpërthyer në ecje dhe dyshohet se kjo ka ndodhur nga një minë me telekomandë.
I plagosur nga ky shpërthim ka mbetur drejtuesi i mjetit “Mercedes A Class”, Preng Gjini, nga Rrësheni. Shpërthimi i makinës ka sjellë dhe dëmtimin e dy makinave të tjera, që ndodheshin shumë pranë.
Ngjarja ndodhi në një moment kur zona ka qenë tepër e populluar, por fatmirësisht nuk pati shumë persona të plagosur, përveç drejtuesit të mjetit dhe një qytetari italian. Shpërthimi alarmoi gjithë zonën, pasi ishte mjaft i fuqishëm.
