Konferenca e Pezës, përbën një ndodhi historike mjaft të madhe në historinë e popullit shqiptar, pasi në të u mblodhën përfaqësuesit e të gjitha forcave politike të vendit dhe përpunuan platformën e përbashkët të luftës kundra pushtuesit fashist për çlirimin e vendit. Kreu i Shtetit, Ilir Meta, 78-vjetorin e kësaj konference e ka shfrytëzuar për të dhënë një mesazh për qeverinë ‘Rama’.
Sipas presidentit, duhet bashkim kundër një pushtimi të ri, nga një sekt e një bandë oligarkësh që kanë uzurpuar institucionet dhe kanë marrë peng të ardhmen e çdo shqiptari. Në fund ai e mbyll me një mesazh të fortë: Peza është një amanet: Besa-besë për të shpëtuar Shqipërinë!
Statusi
Pezë do të thotë Shqipëria mbi të gjitha!
Pezë do të thotë bashkim, kushtrim dhe qëndresë, pa dallim feje, krahine dhe ideje në mbrojtje të interesit kombëtar.
Mesazhet që përcjell edhe sot, pas 78 vitesh, Konferenca e Pezës janë më aktuale se kurrë për të lënë mënjanë ndasitë e interesat afatshkurtra, dhe për t’u bashkuar kundër një pushtimi të ri nga një sekt e një bandë oligarkësh që kanë uzurpuar institucionet dhe kanë marrë peng të ardhmen e çdo shqiptari dhe atë europiane të vendit tonë.
Peza është një amanet: Besa-besë për të shpëtuar Shqipërinë!
O SOT, O KURRË!
