Kryeministri Rama ka ashpërsuar tonet sa i takon lëvizjeve të ushtrisë serbe në kufi me Kosovën, gjatë ditëve të fundit. Kreu i qeverisë shqiptare tha se Serbia duhet ta njohë këtë realitet të pakthyeshëm, e ndërsa sot ndodhemi para manovrave ushtarake të Serbisë në kufirin me Kosovën.
Në konferencën e përbashkët me homologun e tij, Albin Kurtin, Rama u ndal edhe tek manovrat ushtarake që Serbia ka kryer ditët e fundit në kufirin me Kosovën, pas zbatimit të reciprocitetit për targat.
“Shqipëria si anëtarë jo e përhershme e Këshillit të Sigurimit, do të ketë prioritet njohjen e Kosovës, si mbyllje e natyrshme edhe formalisht e shpërbërjes së ish-Jugosllavisë.
Serbia duhet ta njohë këtë realitet të pakthyeshëm. Sot jemi dëshmitarë të manovrave teatrale-ushtarake të Serbisë, në kufirin me Kosovën.
Ato në fakt nuk mbrojnë serbët në kufi, siç pretendojnë vetë qeveria e Kosovës dhe disa gjeneralë të ushtrisë së humbur të Serbisë në luftën me Kosovën.
Qytetarët serbë në Kosovë jetojnë shumë të sigurt. I paguhen edhe faturat e energjisë elektrike si askund në botë. Institucionet atje janë pikërisht për t’i shërbyer atyre qytetarëve serbë, të cilët janë pengje të stanjacionit në dialogun mes Kosovës dhe Serbisë”, tha Rama.
Kryeministri i Kosovës, Albin Kurti, gjatë takimit me kreun e qeverisë Edi Rama në Prishtinë, ka zbuluar edhe diskutimet që kanë zhvilluar sot. Kurti tha se do të punojmë për një treg sa më unik, që qytetarët dhe mallrat të lëvizin sa më lirshëm. Po ashtu ai njoftoi se në gjysmën e dytë të muajit nëntor, do të mbahet një mbledhje e përbashkët mes dy qeverive.
“E uroj për mandatin e ri. Mandatet i kemi marrë në një kohë me plot sfida përballje me pandeminë, rimëkëmbja ekonomike janë disa prej sfidave tona.
Kosova i gëzohet progresit në Shqipëri. Ne mbetemi në gadishmëri për të realizuar sfidat. Ne duhet të rrisim bashkëpunimin për më shumë drejtësi, barazi, zhvillim e mirëqenie për zhvillimin e shqiptarëve.
Ndërlidhja ndërmjet dy vendeve dhe heqja e barrierave është domosdoshmëri. Do të punojmë që tregu të jetë sa më unik, që qytetarët dhe mallrat të lëvizin sa më lirshëm. Nëse ka vende ku duhet të bëhet sa më shpejt, është Kosova dhe Shqipëria. Kemi besim tek njëra-tjetra.
Biseduam për të gjitha fushat për qeverisjen tonë të mirë, dhe e shohim si të rëndësishme koordinimin dhe sinkronizimin gjithë andej. Biseduam edhe për avancimin e marrëveshjeve tona të mëparshme.
Mbledhja e përbashkët në gjysmën e dytë të muajit nëntor. Duhet të kemi një sekretariat koordinuas për dy vendet. Do të udhëhiqet nga Gentian Sala që ka dy pasaporta”, u shpreh Kurti.
Tensionet kanë qenë të larta në veri të Kosovës gjatë ditëve të fundit, për shkak të vendimit të qeverisë kosovare, për të vendosur reciprocitetin e targave të automjeteve nga Serbia.
Presidenti serb Aleksandër Vuçiç, ka paralajmëruar NATO-n se në rast konflikti, nga kjo e fundit do presë vetëm 24 orë, e më pas vendi i tij do ta marrë vetë situatën në dorë.
“Në do ju presim vetëm 24 orë për të reaguar si NATO, në rast konflikti. Serbia do të reagojë dhe nuk do të lejojë atë që ndodhi në 1995 apo 2004”, tha Vuçiç në një intervistë për TV Pink.