Sërish tension në protestë. Protestuesit kanë tentuar të çajnë përsëri kordonin e policisë duke ushtruar forcë ndaj efektivëve. Si pasojë, është lënduar një prej policëve që ishte pjesë e kordonit, i cili më pas është larguar me ndihmën e dy efektivëve të tjerë, që e kanë shoqëruar.
Nuk dihet nëse lëndimi është serioz, ndërsa herë pas herë protestuesit vijojnë tentativën për të çarë kordonin. Edhe Policia e Shtetit u ka bërë thirrje protestuesve të distancohen nga veprimet e dhunshme, pasi tubimet e protestuesve janë në kundërshtim me ligjin.
Policia i është drejtuar organizatorit Gazmend Bardhi, të marrë masa për të ndërprerë veprimet e dhunshme dhe përplasjet me policinë, ose në të kundërt policia do të zbatojë ligjin.
Protestuesit kanë hedhur sende të forta, kapsolla, si dhe kanë tentuar të çajnë disa herë kordonin e policisë, ndërsa në parlament po zhvillohet seanca plenare.
Thirrja e Policisë:
Ju lutemi ruani qetësinë.
Ndërpritni veprimet e dhunshme. Mos hidhni kapsolla, lëndë piroteknike dhe sende të forta në drejtim të policisë
Ju bëjmë thirrje të distancoheni nga veprimet e dhunshme. Mos u përplasni me Policinë.
Veprimet e tubueseve janë në kundërshtim me ligjin. Policia do të zbatojë ligjin.
I nderuar zoti Gazmend Bardhi, si organizator i tubimit, merrni masa që personat që hedhin kapsolla lende piroteknike apo sende te forta ti ndërpresin menjëherë këto veprime. Merrni masa qe personat qe mbajnë maska në tubim ose ti heqin ose të largohen.
