Policia Rrugore ka shtuar masat për parandalimin e aksidenteve në zonën e Durrësit.
Policia njofton se do të monitorohen me radar akset rrugore për parandalimin e shpejtësisë tej normave të lejuara. Ata bëjnë me dije se do të zhvillohen kontrolle në të gjitha rrugët urbane dhe rurale të Durrësit.
Kontrollet janë përqendruar edhe në parandalimin e drejtimit të mjetit nën efektin e alkoolit apo përdorimin e celularit në timon.
“138 leje drejtimi të pezulluara, 6 shtetas në pranga për drejtim mjeti në gjendje të dehur dhe pa leje drejtimi. Si rezultat i kontrolleve, gjatë një jave, nga shërbimet e Policisë Rrugore janë arrestuar 4 drejtues mjetesh duke drejtuar mjetin në gjendje të dehur, si dhe 2 shtetas për drejtim mjeti pa leje drejtimi.
Si rezultat i përdorimit të radarit, janë evidentuar 126 drejtues mjetesh duke qarkulluar me shpejtësi tej normave të lejuara, të cilëve u është pezulluar leja e drejtimit, si dhe 12 drejtues mjetesh për drejtim mjeti nën efektin e alkoolit apo në gjendje të dehur.
Janë ndëshkuar me masë administrative 56 drejtues mjetesh për mospërdorim të rripit të sigurimit, 237 për parakalim të gabuar, 278 për përdorim të celularit gjatë drejtimit të mjetit, 23 për mosvendosje të kaskës mbrojtëse gjatë drejtimit të motoçikletave, si dhe 1894 për shkelje të ndryshme të rregullave të qarkullimit rrugor”, thuhet më tej në njoftimin e policisë.
