Kryeministri Rama u përplas në distancë në Kuvend me dy deputetët e opozitës së re, Ralf Gjoni dhe Myslim Murrizi. Kreu i qeverisë Edi Rama, në fjalën e tij tha se Franca iu ka dhënë atyre që janë me asistencë vetëm 150 euro ndihmë. Kjo ka sjellë shpërthimin në distancë të Gjonit dhe Murrizit. Kundërshtimin e tyre, Rama i cilësoi “dëngla”. Ralf Gjoni e cilësoi si gënjeshtër, e në kundërpërgjigje, Rama tha se flet me shifra konkrete e jo me dëngla. Murrizi ndërhyri, por fjalën e tij nuk e ka pëlqyer aspak kreut i Kuvendit, Gramoz Ruçi.
DEBATI
Edi Rama: Flasin ata që i bëjnë llogaritë pa hanxhiun. E dini ju sa ka caktuar Franca? 150 euro plus… shifër konkrete…
Ralf Gjoni: Çfarë thua more? Ça thua? Gënjen, gënjen, gënjen.
Edi Rama: Unë flas me shifra konkrete, jo me dëngla. Shifra për familjet me asistencë është 150 euro…
Myslim Murrizi: Po t’i s’je mirë…
Gramoz Ruçi: Murrizi tërhiq mbrapsht atë që the.
Edi Rama: Ato të tuat janë dëngla, por unë nuk po flisja për dënglat e tua. Franca…
Edi Rama: Franca ka dhënë njësoj si ne. 1000 euro për ata që janë në vijën e parë. S’po bëj krahasime me Francën, por ato që dëgjoni në TV dhe portale, s’kanë lidhje me realitetin. Dëgjova këtu që kush është ajo qeveri që çon qese? Qeveria italiane jep tallona ushqimi…. Kur flasim të mos harrojmë ku jemi dhe çfarë kemi arritur të bëjmë. Duhet të mos ushqejmë mllef, mërzi dhe pasiguri, nuk e di se çfarë. E kam me shumë të tjerë, ata që ishin këtu dhe të tjerë, individë që flasin dhe nuk dinë se ç’flasin.
