Komiteti i Ekspertëve ka vendosur që të mos ndryshojë masat e vendosura për frenimin e përhapjes së pandemisë, ndonëse ka patur një fluks të infektimeve.
Incidenca javore është rritur, dhe shkak për këtë është qarkullimi i varianit të ri Omicron dhe grumbullimet, thanë ekspertët. Po kështu, rritja e rasteve është reflektuar edhe si pasojë e mos zbatimit të rregullave gjatë festave të fundvitit.
Komiteti Teknik i Ekspertëve mendon se niveli i masave mbrojtëse është në përputhje me zhvillimet epidemiologjike në vend, duke lënë në fuqi masat që janë tani.
Zv.ministrja e Shëndetësisë, Mira Rakacolli tha se përtej rritjes së infektimeve, masat në fuqi janë në përputhje me zhvillimet dhe nuk do të ketë ndryshime.
“Do të vijojnë të mbeten të njëjtat masa në fuqi. Apelojmë që të respektohen të gjitha masat dhe qytetarët të vaksinohen”, tha Rakacolli.
“Ora policore vijon me orën 23:00 – 06:00, vijon të mbetet në fuqi urdhri për lejimin e grumbullimeve deri në 50 persona dhe të aktiviteteve kulturore, sportive etj deri në 30% të kapaciteteve të tyre me prezencë të spektatorëve”.
Eugena Tomini, drejtoreshë e Institutit të Shëndetit Publik, deklaroi se këto dy javë u shënua piku më i lartë i infektimeve në dy vite pandemi.
“Janë rritur infektimet në dy javët e fundit, për pasojë të variantit Delta dhe Omicron dhe mosrespektimit të grumbullimeve gjatë festave të fundvitit. Fatmirësisht kemi qëndrueshmëri në shtrimet në spitale, nuk është reflektuar rritje e shtrimeve. Gjatë kësaj periudhë është shënuar piku më i lartë në dy vite pandemi”, tha Tomini.
