Përfaqësuesit e opozitës në Grupin Politik për Reformën Zgjedhore kanë propozuar të hënën si ditën e mbledhjes së këtij grupi.
Oerd Bylykbashi i PD-së dhe Petrit Vasili i LSI-së u kanë dërguar një letër përfaqësuesve parlamentarë në këtë grup, Damian Gjiknuri dhe Rudina Hajdari.
Gjithashtu ata kanë vënë në dijeni për këtë qëndrim partnerët ndërkombëtarë të përfshirë në proces, BE, SHBA, OSBE dhe KiE.
Synimi i kësaj mbledhjeje është përmbyllja sa më shpejt e kësaj reforme.
“Reforma aktuale ka filluar me kërkesë të Opozitës në 2017 dhe falë veprimeve të njëanshme për minimin e saj nga shumica qeverisëse, ka qene e pamundur përmbyllja e saj”,- thuhet në letrën e opozitës, ku përmendet se për shkak të shkeljes së standardeve nga ana e mazhorancës për 3 procese zgjedhore me radhë, reforma zgjedhore është rikthyer si një nga 15 kushtet për hapjen e negociatave me BE.
“Rifillimi i procesit më 11 maj është goditur vazhdimisht nga deklarata dhe veprime që kanë shkaktuar krizë politike e që, qartazi, kanë patur si qëllim shkatërrimin e këtij procesi jetik politik. Por, pavarësisht këtyre veprimeve të qëllimshme, Opozita e Bashkuar nuk do të heqë dorë nga objektivi i saj për të përmbushur pa vonesë obligimin e saj para shqiptarëve për zgjedhje demokratike”, shkruajnë Oerd Bylykbashi dhe Petrit Vasili.
