Kryesore

Pas çmimit nga Bashkimi Evropian, Arbër Hajdari ka një mesazh për të rinjtë

               Publikuar në : 15:46 - 18/05/19 S.N

Në më pak se 3 vite, fondacioni “Fundjavë Ndryshe” ka sjellë një ndryshim rrënjësor në shoqërinë shqiptare. Me në fokus shtresën më vulnerabël, të varfrit, kanë arritur të ndërtojnë dhe restaurojnë 299 shtëpi për familjet në nevojë, si edhe shpërndajnë mijëra çanta me ushqime e qindra mjete shtëpiake.

Si edhe janë kujdesur për shëndetin e tyre. Duke kryer 12 ndërhyrje kirurgjikale dhe 75 fushata për dhurimin e gjakut. Ndër të tjera kanë shpërndarë bursa dhe mjete shkollore për fëmijët në nevojë. Duke ndryshuar kështu të ardhmen e shumë njerëzve, shpesh të harruar nga politika e shoqëria.

Për këto vlera të çmuara, ambasadori i BE-së në Tiranë, Luigi Soreca, i dorëzoi drejtuesit të Fondacionit, Arbër Hajdarit çmimin e parë në konkursin “Pse dal vullnetar”.

Pjesa më e rëndësishme e Fondacionit “Fundjavë Ndryshe” janë vullnetarët; të rinj, mosha e mesme, e deri tek fëmijët. Në fjalën  e tij Hajdari ia dedikon pikërisht atyre çmimin, të cilët kontribuojnë çdo ditë për përmirësimin e shoqërisë shqiptare.

“Ne kemi një numër shumë të madh vullnetarësh, janë rreth 11 mijë në të gjithë Shqipërinë. Dhe çdo ditë që kalon numri shtohet dhe ne po kuptojmë që ka dëshirë për të qenë vullnetarë. Ndaj ky është një çmim që i dedikohet të gjithëve, të cilët kanë dhënë gjënë më të vyer që kanë, kohën. Për të ardhur në gjithë aktivitetet e bamirësisë që ne kemi bërë, që nuk janë pak.

“Fundjavë Ndryshe” ka një aktivitet tashmë shumë të zgjeruar. Ndaj unë gjej rastin të falënderoj çdo vullnetarë i cili ka harxhuar nga koha e tij, sikur edhe 10 minuta. Si edhe i ftoj gjithë të rinjtë që të bëhen pjesë e aktiviteteve vullnetare, jo vetëm në “Fundjavë Ndryshe”, por në çdo organizatë tjetër. Sepse e rëndësishme është që të vëmë kohën në dispozicion të çështjeve sociale.”/ TIRANA TODAY

Kthehu
WhatsApp Denonco ne TT